(ElNuevoDia) – Despues di un reunion cu a tuma luga diahuebs cu lidernan magistral, gobernador Pedro Pierluisi a anuncia cu e aumento di $1.000 pa luna concedi na e maestronan, y cu tabata vigente te 2024, ta bay ta permanente.
Igualmente el a informa via Twitter cu el ta bay pone su firma pa e Proyecto di Camara 513 cu ta garantisa pa ley e aumento di $2.700 den e salario minimo di e maestronan. El ta bay firma tambe e Proyecto di Senado 573 pa reactiva e carera magistral cu ta consisti den mas placa pa e educadornan cu obtene un masters of un doctorandus.
Ademas el a anuncia e creacion di un mesa di dialogo cu e fin di busca alternativanan pa mehora e retiro di e maestronan. E lo consisti di cuater organisacion y cuater integrante di gobierno. El a indica cu nan ta bay tin e prome reunion otro siman.
Prome cu e encuentro e lidernan magistral a ratifica cu nan no ta bay acepta “promesanan” manera alternativa pa atende cu e reclamo di husticia salarial cu a pone riba caya miles di educadornan cu ta busca miho condicionnan di bida.
Dialuna e gobernador a anuncia un aumento di $1.000 pa luna pa e maestronan cu ta bay wordo financia cu fondonan federal te cu 2024. Despues di esey, sinembargo, gobierno ta bay mester identifica fuentenan di ingreso estatal pa e por continua.
Mientras tanto e secretario di educacion a bisa cu aunke e tema di retiro di e maestronan no ta bao di control, “e maestronan lo tin un respuesta preciso for di e gobernador y awe nan ta bay tine. Nos lo ta dunando expresionnan”.
