(Infobae) – Mirando cu eleccionnan di Senado y Camara a cuminsa, e pais ta den un momento fundamental di propaganda politico cu lo defini e proximo cuater aña di e grupo cu lo bira lider di iniciativanan legislativo nobo y cu esey e transformacion di e pais.
Asina mes, ta keda poco pa conoce ken lo ta hefe di Estado nobo y hopi hende ta den incertidumbre, sinembargo, encuestanan cada dia ta mustra un tendencia di voto cu ta kibra structura tradicional y ta cuminsa lidera procesonan alternativo.
Den e sentido aki, un investigacion realisa pa organisacion filantropico Luminate, a revela cu hobennan na Colombia, cu ta representa un porcentahe grandi di votadonan, no ta apolitico of indiferente na votacion manera a kere pa hopi tempo, sino cu nan apatia ta debi cu nan no ta confia mas den politica tradicional, ni den partidonan politico of institucionnan manera ta plantia awendia.
E resultadonan di e organisacion ta mustra cu tur esaki ta pa motibo cu e interesnan di e hobennan ta enfoca mas riba proteccion di medio ambiente, feminismo, lucha contra desigualdad y derechonan LGBTQ+, temanan cu no ta prioridad pa partidonan tradicional ni politiconan cu ta defende ideanan conservador.
“Nan tin un desconfiansa profundo di institucionnan como Congreso, poder hudicial, Ehercito y Polis, percepcion cu ta asocia na fenomeno como corupcion y falta di atencion na interesnan ciudadano”, Felipe Estefan, director pa Latino America di Luminate a splica.
Na esaki, a suma cu nan ta considera cu un politico mester permanece pafo di scandalnan di corupcion, cu dia pa dia ta conoci na Colombia, cu ta un di e paisnan di e region cu mas problemanan di e tipo aki.
