Hobennan y salud mental, nos a logra conecta adolescencia cu e pandemia?

Ta casi dos aña cu pandemia di Covid-19 a yega na Aruba y a causa un impacto profundo den hopi hende. E consecuencianan ta diferente den funcion di e circunstancianan personal di cada hende y expertonan ta adverti cu generalisa por ta un eror. E pandemia a afecta tur, pero no di e mesun forma.

Den caso specifico di hoben y/of adolescente e impacto ta real, ya cu e parti aki di e sociedad ta mas vulnerabel. Nan ta den etapa di capacidad di adaptacion di nan sistema nervioso, loke ta nifica cu nan ta siña hopi mas y nan ta absorbe den mayor medida loke ta sucede rond di nan, ademas cu nan ta den proceso di independencia, den construccion di nan pilarnan structural.

Contrario na nan, adultonan tin un madurez mayor biologico y un celebro mas indiferente. Nan tin cierto base solido cu a permiti nan wanta e impacto di manera diferente. Por ehemplo, pa un sistema di aislamento adultonan tin mas recurso y strategia pa regula nan y surpasa e malestar manera na cas, haci actividadnan dedica na e hogar of na e pareha cu ken ta biba.

Un adolescente ta hopi mas dependiente di nan amigonan, sea di scol of di otro luga, sali bay un caminda, etc. Aunke manera a menciona caba, generalisa ta un eror. Cada persona tin nan circunstancianan particular, tur ta rond di factornan di proteccion y riesgo, den funcionnan con nan lo actua, e resultado lo ta diferente.

Mientras cu medidanan di aislamento y cuarentena tabata un situacion contradictorio pa adolescentenan cu tin e necesidad di sali y no por a bay niun caminda pa cumpli cu e medida aki, ta hopi importante pa comprende di kico e etapa ta consisti. Nan ta den proceso di construccion di nan identidad, nan descubriendo ken nan ta y kico nan lo kier ta.

Pero esaki ta un etapa den cual nan ta haya necesario separa di nan famia, pa motibo cu te na e momento ey, mayornan ta e principal fuente di criterio y balornan; pero ta yega e punto unda e individuo kier separa y construi su mesun moral.

Ta p’esey cu e idea di cera nan mes den nan camber of sali y bay un caminda ta cobra sentido si nos ta compronde nan mas profundo. Nan mester separa pa nan por compronde nan mes, esaki ta entre nan amigonan of colega cu tin un papel decisivo, pa motibo cu nan tambe ta bay bira un pilar fundamental pa construi e identidad ey y escala di balornan.

Den e edadnan aki, e pertenencia na un grupo ta hopi importante. Si na esey nos ta suma cu biologicamente nan no ta prepara pa percibi e riesgonan ni stop nan impulso mescos cu un adulto ta hacie, ta parce cu ora nan mayornan ta prohibi nan di sali y wak nan amigonan por bira un tarea casi imposibel. Aislamento of cuarentena pa nan ta bay contra un necesidad biologico y social, pa loke no ta straño cu nan salud mental ta wordo afecta.

Por tin hopi consecuencia pero ta depende di cada persona. Depresion, trastorno di ansiedad, fobia, insomnio, trastorno di conducta… y pandemia a multiplica e factornan di riesgo, pa loke nan a bira mas vulnerabel y nan a wordo priva di loke mas nan ta gusta haci.

Adolescente of hobennan ta sali y ta keda cu nan amigonan pa motibo cu ademas cu esey ta fundamental pa nan desaroyo, e ta un fuente di auto regulacion, ta un recurso di e cual nan ta depende hopi pa nan sinti miho.

Ta importante si ta pone mas empatia, si tur famia ta pasando pa un mal momento, ta importante pa reconoce cu pa nan, exploracion social ta hopi mas valioso. Pa un adulto, e famia cu el a construi of su trabao ta un di su principal fuente di autoestima y bienestar. Si esaki ta wordo altera, ta logico pa pensa cu e lo por ta pasando malo. Pero pa un adolescente of hoben, su area social ta esencial p’e, nan mester comunicacion di nan mayornan.

Pa por remedia e daño, mayornan por haci uso di contraresta e impacto mediante terapia, deporte, comunicacion, fomenta e bida social, bishita e luganan cultural di cada ciudad. Traha den dinamica familiarnan cu por ta afectando e hoben, por ehemplo, kico nan mester? Con por yuda? A busca un espacio pa papia y combersa riba su inkietud? Ta trata di agrega of kita algun ingrediente, pero no ta un tarea facil. E clave ta den e recursonan di e cual mayornan ta dispone di nan pa minimalisa e impacto.