Prome fase di proyecto di renobacion di edifico di DAS finalisa; Glenda Hernandez: “Poco poco nos ta yegando na e metanan”

Ayera mainta a tuma luga e entrega oficial di e yabi di e edificio completamente renoba di Departamento di Asuntonan Social (DAS). Durante un conferencia di prensa, Minister di Asuntonan Social y Hustica, Sr. Rocco Tjon a enfatisa e importancia di e stap aki pa sector social di Aruba.

Directora di DAS, Sra. Glenda Hernandez a elabora ariba e retonan cu tin pa e sector, proyectonan nobo cu nan a habri y tambe proyectonan cu tin riba mesa pa futuro pa yuda fortalece e servicionan cu e departamento ta ofrece na su clientenan.

E proyecto di renobacion di edificio di DAS ta un proyecto cu a wordo inicia door di Minister Glenbert Croes durante su termino como Minister di Asuntonan Social. E proyecto a inicia na 2020, y na 2021 e trabaonan mes a cuminsa. Minister Tjon a hereda e proyecto aki y a percura pa esaki wordo finalisa. “Mi kier gradici personal di DOW pa percura cu esaki por ta posibel. Obviamente e contratista cu a haci tremendo trabao”, Tjon a expresa.

Na mesun momento el a anuncia cu den e presupuesto di e aña aki, Ministerio di Asuntonan Social a presupuesta fase tres di e proyecto di renobacion aki, cual ta un otro edificio, y mas tarda den luna maart ta bay tene subasta pa asina despues e trabaonan por cuminsa, pa e aña aki mes henter e edificio por keda completamente renoba.

Tjon a remarca cu DAS ta bay sigui haya sosten di Ministerio di Asuntonan Social di diferente forma, y a subraya e proyecto di renobacion como un forma di sosten den forma di inversion den loke ta e parti infrastructural. El a menciona tambe cu tin den presupuesto e aña aki pa DAS un proyecto ECT, cu el a indica ta algo sumamente importante.

“Mi ta corda algun luna atras ora mi mes a bishita e departamento, esey tabata e punto di preocupacion mas grandi di tur e personal. Nos a percura pa esaki ta den presupuesto e aña aki, es decir, cu e personal lo haya tur e hermentnan cu nan tin mester pa nan haci nan trabao miho. Di e forma aki a traves di cursonan tambe, na maart ta bay tin un curso pa full e personal cu ta traha den e cadena social. Nos ta keda inverti sigur den e departamento pero tambe den e personal”, el a agrega.

Pa loke ta trata pregunta di ayudo den barionan di Aruba, Tjon a splica cu aña pasa nan a firma un acuerdo cu CEDE Aruba den cual a aloca hopi fondo na un manera structural pa CEDE. A traves di e alocacion di e fondonan aki, na ta inverti entre otro den e barionan.

El a señala cu for di su ministerio nan tin un plan di maneho y un proyecto cu den su concepto ta esun di mas importante, cu ta “veilige barios” (barionan sigur), caminda nan ta inverti den e parti di programanan pa despues di scol, cu e Minister ta indica ta hopi importante. “Di e forma ey inversionnan ta keda tuma luga y unabes cu presupuesto 2022 wordo aproba tur e programanan aki lo bira realidad”, el a agrega.

Sra. Hernandez, directora di DAS, tambe a expresa su alegria cu e finalisacion di e prome fase di e proyecto di renobacion. “Esaki ta eigenlijk un deseo di hopi tempo caba di nos personal di Sociale Zaken y bo ta wak cu poco poco nos ta yegando na e metanan. E no ta facil pasobra pa haya presupuesto pa pone riba reservering di Minister tabata hopi dificil. Pero nos a logra si cu Minister Glenbert y Minister Rocco Tjon, kiermen nos ta hopi contento y nos ta bay sigui pa fase B”, el a expresa. El a gradici tambe tur persona involucra cu a traha pa e proyecto aki por a bira realidad.

Pa loke ta trata retonan den e area social, Sra. Hernandez a ricibi pregunta for di un miembro di prensa tocante e crecemento di e retonan social y si e luga ta acapara pa brinda tur e servicionan necesario. El a contesta cu semper e retonan social tabata grandi y DAS semper a purba di acapara e problema ey.

El a indica tambe cu e luga ta suficiente pa brinda tur e servicionan necesario. El splica cu aworaki hoofdkantoor di bijstand ta na San Nicolas, y tambe e siman aki nan ta bay cuminsa cu digitalisacion di bijstand, locual kiermen cu e hendenan por aplica online. El a menciona tambe cu ta bay tin kiosco pa hendenan cu no por haciele pa ayudo. “Si e ta acapara e trabao social? Semper nos mester mas fondo pasobra e trabao social ta continua y ta grandi”, el a enfatisa.

Sra. Hernandez a splica tambe tocante e diferente servicionan cu nan ta ofrece. Manera ta conoci nan tin bijstand, nan tin servicio psicologo, servicio social y di abogado. Apart di esey nan a habri un centro pa hoben y famia pa yuda famia y hobennan den educacion. El a menciona tambe cu nan ta bezig ta lantando hunto cu Minister Rocco Tjon un departamento pa hoben y mucha, cu lo bira un centro di experticio pa traha na bienestar di derecho di e muchanan. Segun el a indica, esey ta cosnan cu nan ta haciendo for di Social Crisis Plan. El a indica tambe cu e proyecto Family Justice lo bin den februari.

“Family Justice ta bay bin, Centro pa Hoben y Mucha ta bay bin, Centro pa Hoben y Famia ta habri caba. Dos centro a habri pa mucha cu discapacidad aña pasa, cual ta un logro pasobra despues di 35 aña nos a haya e servicionan. Cu nan ta suficiente? No, nan no ta suficiente. Pero nos ta canando den e bon caminda”, el a señala.

For di otro miembro di prensa, Sra. Hernandez a ricibi e pregunta, pakico ta lanta proyectonan nobo y no fortalece servicionan cu tin caba? El a contesta: “Lanta ta fortalece. Si bo wak Family Justice nos ta fortaleciendo e cadena entre medico, entre social y entre huridico. Esey ta e cadena cu nos ta bezig ta haciendo palabracionnan pa traha hunto miho cual den pasado no tabata sucede pasobra cada un ta traha riba nan mes. Y p’esey mi ta bisa fortaleciendo locual tin”, el a finalisa.