(CiberCuba) – UNICEF na Cuba y Gobierno di Hapon ta financia na e isla un proyecto pa fortalece e capacidad sanitario di e pais pa enfrenta e crisis epidemiologico door di e pandemia di coronavirus.
E colaboracion aki, cu ta conta cu participacion di Gobierno di Cuba, tin obhetivo di desaroya accionnan pa garantisa e seguridad humano den temponan di pandemia, a traves di apoyo na e sistema di salud, e campaña di vacunacion y educacion sanitario, segun un comunicado ariba website di UNICEF Cuba ta indica.
Segun e nota, e proyecto aki ta den proceso di compra di ekipo y suministronan pa un balor di 2.018.570,48 dollar cu lo ta destina pa e fortalecemento di e capacidadnan tecnico di institucionnan di salud di e isla y dos centro di ciencia cu ta pertenece na BIOCUBAFARMA, vincula na e desaroyo di vacuna.
Nan ta indica cu e apoyo aki lo beneficia tambe un total di 253 policlinica di diferente provincia. E ta bisa tambe cu e lo fortalece e capacidadnan institucional di 14 hospital di La Habana vincula na e atencion materno infantil, como tambe e Centro di Ingenieria Genetico y Biotecnologia y e Instituto Finlay di Vacuna.
Nan ta calcula cu e proyecto aki por beneficia casi shete miyon di residente na e isla, incluyendo 1.271.231 mucha.
Cu e proyecto aki lo duna tambe capacitacion tecnico na e personal sanitario encarga cu e programa di vacunacion, vincula na e atencion pediatrico y enfermeria neonatal den e nivel di atencion primario di salud. Lo desaroya intervencionnan di promocion y educacion pa salud tambe.
E colaboracion entre e organismo di Nacionnan Uni, e Gobierno Hapones y e autoridadnan di e isla ta pretende ademas mehora e respuesta institucional y e capacidadnan tecnico di e atencion di salud pa trata complicacionnan vincula na COVID-19.
