Despues cu den un sesion maratonico siman pasa a aproba e ley cu ta duna e formacion di cada ministerio, no a dura mucho pa nos haya prueba di e ‘grabbelton’ cu formacion di gobierno a para bira. E caso di e stranhero cu a haya un sentencia di corte di Promer Instancia pa deportacion, y a haya un permiso temporal di e actual ministro encarga cu Dimas, a causa conmocion. Mesora ta surgi e pregunta pakico e ministro cu ta encarga cu Labor, ta maneha Dimas tambe. E argumento tabata cu asina lo tin un maneho mas eficiente y fluido… Esey nos a ripara, den sentido negativo si. Pone e dos carteranan hunto den man di un ministro cu ya den pasado un biaha no por a bira ministro, ta hunga cu candela.

 

Pakico no a pone Dimas simplemente bao di Husticia, unda e ta pertenece na promer lugar? E tabata parti semper di Husticia, te cu den decada di 2000 un ministro di Husticia a haya asina hopi problema cu Hulanda, cu otro ministro a haya e cartera temporalmente. Pero… e no a bolbe nunca. E mesun ministro cu ayera tabata den corte tabata durante dos periodo di gobernacion ministro encarga cu e cartera di stranheria y integracion. Su aparicion na corte no tin nada di haci cu su maneho specifico ey, y probablemente lo no haya investigacion tampoco, pasobra e probable exigencia den e caso Avestruz lo ta di varios aña. Djis compara cu e file di e anterior ministro di mesun gabinete cu a haya un condena dos biaha caba. Riba 20.000 pagina di texto no ta solamente un dolor di cabez pa tur esnan envolvi profesionalmente, pero e ta tambe muestra di seriedad di e caso; no ta trata di algun infraccion menor.

En todo caso, ora cu a kere cu e siguiente gabinete lo a pone ‘orde op zaken’ y lo a duna e ministro di Husticia e responsabilidad ey atrobe, esey no a sucede. Definitivamente hunto cu tur otro asunto, Dimas a bira un pieza mas den e grabbelton cu e formacion di ministerionan a para bira. No por detecta ni un sombra mas di e set up original di 1986, unda a trata di reuni e asuntonan cu pa cierto logica ta pertenece hunto, den un ministerio. Claro cu den formacion lo por tin cierto cambio menor, pero e sancocho di cada biaha diferente composicion ta haciendo mas daño cu bon. Naturalmente nos a tende e argumentonan di e politiconan, ‘cu forma gobierno ta un asunto politico y ta basa riba decision politico’. Si, pero no ta pasobra e ta un asunto politico, automaticamente tur decision tuma encuanto formacion di gabinete ta bon tuma y ningun hende no por bisa nada. Henter e problema di gobernacion, rond mundo, ta cu politico ta tuma decision politico cu despues ta resulta desastre social y economico. E consecuencianan no ta pa nan, ta pa nos.

Pa bolbe na e problema – tecnico – di Dimas den mesun man cu esun cu ta maneha e conseho riba mercado laboral. Esaki mester ta un asunto di cautela gubernamental; pasobra e ta un asunto delicado, un proceso cu hopi posible momento unda corupcion por hunga un papel, ta importante cu ‘un ta controla otro’. Ora tin trayecto separa ta bira dificil pa un cierto funcionario cu menos bon intencion haci promesa di permiso, pasobra no ta den su man so. Naturalmente un ex-ministro a logra fabrica un negoshi di conseho positivo toch, pero esey tabata posible pasobra no tabatin, y ainda no tin un control interno independiente. Awor henter e proceso aki ta den man di un ministerio cu ta opera manera un ‘Familie BV’, esaki mester ta garantia di calidad y integridad? Nos a mira caba con recientemente e ministro concerni a percura pa ‘sideline’ e directora di Dimas, poniendo pen pa firma permiso den man di e ex-bode, nombra oficialmente como director adjunto pa e gabinete unipartidario 2009 – 2017, y awor confirma den e puesto pa e actual coalicion. “Only in Aruba!!” Ki señal nan kier duna na nos hobennan? Pa nan no bay studia mas, sino cuminza full abao ta bari/mop den oficina, colga na rabo di politico y bira director toch? Esey lo tin un bentaha grandi si pa nan, ya cu nan no lo tin debe di estudio mas. Y pa gobierno lo tin e bentaha cu por simplifica e trabao di Departamento di Recurso Humano, pasobra nan por djis stop di pone exigencia specifico di estudio y experiencia pa cada puesto, sino warda te ora e ministro manda bisa nan ta ken el a nombra, unda y pa cuanto salario…

Y, pa corona obra, nos a haya e metemento di e ministro encarga cu Dimas den e caso di e stranhero cu a haya caba un sentencia di huez riba su apelacion contra un decision negativo riba su peticion pa permiso. Nos no mester di mandatario cu ta bay hunga huez, despues cu huez a haci su trabao caba. Ta p’esey e departamento mester ta den man di e ministro encarga cu tur otro aspecto di husticia, manera tabata e concepto original di 1986. Ta parce cu nos gobiernonan ta incapaz pa mehora bay dilanti, y tampoco capaz pa reestablece orden den algo cu tabata masha bon; ta ken a manda nan organiza grabbelton…