Dialuna mainta na Corte di Prome Instancia a cuminsa cu e tratamento di caso Avestruz, e caso mas grandi di corupcion di tereno na Aruba. Un total di 11 sospechoso ta wordo acusa di ta involucra den e caso aki, caminda e sospechoso principal ta ex-minister y actual parlamentario Sr. Oslin “Benny” Sevinger.
Abogado Sr. Rudy Oomen, kende ta representando tres acusado den e caso aki, a declara na prensa despues di e regiezitting cu e forma con Ministerio Publica a procede cu e caso aki ta inhusto, y e punto principal pakico ta pasobra abogadonan a ricibi e dossier cu ta consisti di mas di 20 mil pagina, apenas den luna di december.
“Basicamente loke mi a trece dilanti ta como defensa nos ta sinti cu nos a wordo gebulldozerd cu un dossier di casi 22 mil pagina, cu pa nos tur ta imposibel pa pasa door di dje. Y bin aki awe despues di un luna cu nos a haya e dossier pa bisa kico nos kier investiga ainda of cua testigo nos kier scucha”, abogado Oomens a indica.
El a splica cu el pidi hues mas tempo, sikiera te final di maart pa nan por pasa door di tur e documentonan y tambe haya documentonan cu no ta den e dossier – cu pa e defensa ta importante pa tin pa por fiha nan posicion. Diaranson hues ta bay dicta si ta aproba e peticion di e abogadonan of no.
For di miembro di prensa abogado Oomens a ricibi e pregunta si e ta kere cu lo trata e caso aki e aña aki ainda. Segun e abogado a contesta, tur cos ta depende di kico mas lo bin acerca. Pero mirando e volumen y magnitud di e caso, e no ta wak cu lo trata e caso prome cu receso di zomer. “E ta depende hopi con e investigacion adicional ta bay tuma luga, e testigonan, si nos por haya tur testigo aki na Aruba, si tin testigo afo, tur e cosnan ey por complica e procedura”, el a agrega.
Pa loke ta trata e comunicado di prensa recien cu Ministerio Publico a saca tocante e ciere di e caso contra e naamloze venootschap Pristine Estates – cu ta pertenece na un di e clientenan di abogado Oomens – pa medio di un transaccion di 1 miyon florin, e abogado a bisa: “Esey mi no por duna comentario riba dje. Mi ta ‘kinan pa tres otro cliente y riba esey tin hopi cos ta wordo bisa rond caba, mi no ta bay duna comentario”.
Oomens a señala tambe cu e caso aki a cuminsa door di un keho di dos politico y e keho ey no ta den e dossier cu nan a ricibi. Of te caminda cu e mes a lesa, ni su persona ni su coleganan a topa cu e documentonan di e keho aki. E ta indica cu e kier haya e keho ey completo den e dossier pa e por husga for di ki angulo e keho a bin. “E ta un derecho cu bo tin como defensor pa bo wak con e cos ‘ki a cuminsa”, el a bisa. “Bo tin cu por check cada paso cu Ministerio Publico a tuma den e caso aki, y e prome paso ta e keho. Kiermen nos kier e papelnan cu ta encera e keho, no mas cu esey”.
Abogado Sr. Doris Canwood tambe a enfatisa cu hopi biaha mayoria di e buffetnan di abogado na Aruba nan capacidad ta chikito, vooral si ta trata “strafzaken”. El a indica cu no tin e buffetnan cu ta specialisa den strafzaken, cu tres of cuater abogado cu ta haci esey so. “Ora nos a haya e dossier na december, cu ta un temporada cu hopi di nos ta cu vakantie, casualidad cu nos tur tabat’ey. A tuma mi un siman pa solamente print e dossier. Aworaki den nos so, of tin cu ta dos hende, mester bay pasa door di un dossier cu ta mas cu 20 mil pagina”, el a bisa.
El a remarca cu den caso di su cliente e mester repasa casi henter e dossier, pasobra e ta wordo menciona den otro casonan tambe. “Mi no tin luho di bisa mi ta scoge y mi ta bay wak solamente unda ta papia di mi cliente, pasobra mi mester lesa tambe kico e otronan ta bisa”, el a indica.
“Mi a pasa door di mita di e dossier. Mi tin un idea kico e onderzoekwensen nan ta, pero mi no ta eynan ainda. Y mester corda tambe cu parti di nos onderzoekwensen ta un dossier completo. Si e dossier no ta completo of si falta pagina, mi mester sinta conta pagina pa sigura cu mi tin tur pagina, pasobra tin caminda cu falta 20 pagina otro pida falta 10. Dus nos no tin ni un dossier completo. Tur eseynan nos kier, y chens ta grandi cu unabes bo tin e pidanan ey lo bay bin mas onderzoekswensen”, el a agrega.
Abogado Canwood a subraya tambe cu den casonan similar na Hulanda, abogadonan a yega di haya casonan caminda cu a duna e defensa mas cu seis luna djis pa haci investigacion, contrario na loke ta wordo pidi di nan aworaki den un luna di tempo. “E prome periodo tabata 31 di januari cu nos niun no por a cumpli. Awe nos ta 7 di februari y tampoco nos por a cumpli”, el a enfatisa.
Ayera no a tuma ningun decision. Awe hues lo scucha onderzoekswensen cu si a wordo entrega door di otro abogadonan y diaranson hues lo tuma un decision. Canwood a menciona cu segun hues a indica lo tin un segundo zitting na april.
