For di chikito Johnaikel Acosta a lanta den un ambiente unda cu e tabata rondona di deporte, mas tur cos a cuminsa tuma un rumbo mas significante den su bida na momento cu el a cuminsa hunga baseball den su bario.

E hoben aki a dedica su mes na e deporte cu hopi amor y perseverancia, y awendia ta un hoben cu a logra bay leu danki na e pasion y amor na e deporte, na cual el a dedica tempo y hopi esfuerso.

Cu e apoyo di su mayornan Narcisa y Johnny, Johnaikel a logra bay un stap mas leu cu su deporte, hayando un beca pa studia na Merca, unda cu e por a desaroya su mes tanto como un atleta y como un studiante hoben cu lo logra tin un carera tambe.

Johnaikel a prepara su mes hopi mentalmente, el a comenta: “Despues cu tur cos a cuminsa cana, y e tempo a bin mas cerca, e no tabata un caminda imposibel, pero si un poco dificil, pa adapta na nan cuminda, sistema di scol y hasta na nan cultura.”

Hopi biaha nos ta mira sea den medionan di comunicacion, y hasta peliculanan cu e trato na studiantenan stranhero no ta hopi deseabel, cual sa causa preocupacion den tanto mayornan y studiantenan cu ta considerando un estudio fuera di e pais. Sinembargo, e realidad hopi biaha ta diferente. Den e caso di Johnaikel, “locual mi a gusta y por bisa ta cu henter ni carera na Merca mi tabatin e gran oportunidad di experiencia diferente cultura, danki na e gran bentaha cu nos tin di sa mas di un idioma, y asina por defende nos mes y socialisa cu mas comodidad.”

Como un studiante cu un beca relaciona cu atletismo, Johnaikel mester a balansa e bida di un studiante hunto cu e bida di un atleta. “Den bida semper mi ta bisa ‘carga bo disciplina y consistencia paden y pafo di veld’. Talento so no ta defini tur cos, e resultadonan na scol tambe ta importante. Si e resultadonan aki no ta adecua, nos mester ahusta e balans como un atleta y studiante,” Johnaikel a conta.

E hoben aki a dedica varios aña na su estudio y su talento den baseball. El a balansa su carera y deporte di un manera cu el a logra resalta den ambos, birando capitan di e ekipo di baseball na su universidad, y despues cabando su carera cu su graduacion.

Mirando cu su caminda na Merca tabata yegando su final, cu resultadonan sumamente exitoso unda cu el a representa su pais cu hopi orguyo y lagando e nos Isla su nomber na halto, e hoben aki a bolbe su cas back y asina a tuma un tempo pa disfruta di su logronan conhuntamente cu su famia.

Awo, a yega e momento pa sigui e caminda y sigui desaroya su mes tanto como un studiante, cu pronto lo ta un profesional studia, y tambe como un atleta cu lo desaroya su mes den e deporte di baseball. Aunke su rumbo ta completamente diferente y opuesto na Merca, e ta cla y prepara mentalmente pa conkista Hulanda.

“Mi por bisa cu aunke mi ta bayendo completamente contrario di Merca, mi ta 85% fisicamente y mentalmente cla y emociona pa e experiencia nobo aki. Danki na varios famia y sernan keri, mi ta rondona di apoyo y conseho cu lo yuda mi persona logra tur mi metanan,” Johnaikel a conta.

E fin di un aña academico ta acercando, y nos ta mirando hopi di nos hobennan cu ta den gradua ta considera unda nan lo sigui nan estudio, cual tambe ta trece varios preocupacionnan tanto pa e mesun studiante como pa e mayornan. Pero nos por mira un gran ehempel den e hoben aki, cu desde comienso di su hubentud a sinti amor pa un deporte, y a dedica su mes na desaroya su talento den e deporte, mas nunca lubidando di e importancia di su educacion, y dedicando e mesun cantidad di esfuerso, dedicacion, perseverancia, amor y disciplina.

Como un persona cu ya caba a pasa door di e retonan cu studia den stranhero ta trece, y a logra un exito grandioso, e kier laga un gran ehempel di tur e exito cu nos por logra si nos keda persevera cu disciplina y dedicacion.

“‘You just can’t beat the person who never gives up’. Cu esaki mi kier bisa lucha pa bo soño y tur e metanan cu bo tin. Manera mi a menciona anteriormente, preparacion mental ta hopi importante pa asina bo por sigui riba e caminda,” Johnaikel a comparti.