Durante un conferencia di prensa diahuebs 3 di februari, presidente di sindicato SADA, Sr. Edward Maduro a informa cu SADA lo bay door cu e tumamento di oranan liber, cu of sin aprobacion di Gobierno di Aruba.
Sr. Maduro a indica cu nan tabata den reunion cu henter e team di maneho y staff di Cuerpo di Aduana, caminda nan a bolbe reitera y splica cu, cu of sin aprobacion di Gobierno, nan ta bay cuminsa tuma e 22 ora tur luna, manera nan a indica na comienso di e aña aki.
Manera ta conoci caba, e bloke sindical, cu ta consisti di sindicatonan SEPPA, SIMAR, SADA, SPA y FTA, a indica di januari caba cu lo cuminsa traha menos ora pa luna entrante 1 di februari. Februari a yega caba y segun Sr. Maduro a splica, diaranson 2 di februari nan a splica e directiva di Cuerpo di Aduana, di mesun manera cu nan a splica Gobierno, cu e manera con nan ta pensa pa tuma e oranan lo ta e manera mas responsabel pa haci esaki.
“Mi tin cu bisa cu den mi experiencia ta prome biaha cu un reunion asina ta tuma luga, cu henter e ekipo di maneho di Cuerpo di Aduana. Unda cu normalmente nos ta sinta cu parti di e leiding, cual ta e director mas tanto, pero e biaha ki nos a sinta cu staff completo y tambe duna nan un bista ariba e pensamento cu nos tin pa loke ta trata tumamento di e oranan liber pa luna”, Maduro a agrega.
Segun locual el informa, a yega na palabracion cu otro siman diaranson nan lo pone un punto final na e manera cu nan ta bay efectua e tumamento di oranan pa luna. El a splica cu posiblemente nan lo pone esaki den un protocol pa asina por atene na dje tambe. “Mi ta kere cu como sindicato responsabel nos tin cu hacie na un manera cu tur hende por haci uso di dje sin perhudica e servicio y tambe sin cu esaki lo bay fomenta trabao adicional, sin cu e mester bay na gasto di over time”, el a bisa.
Sr. Maduro a indica cu Leiding di su banda a compronde nan punto di bista y e ta kere cu puntonan valido a wordo intercambia, pa asina den conhunto nan ta riba un solo liña. El a menciona tambe cu mas cu claro cu e Minister cu ta encarga cu Cuerpo di Aduana lo wordo poni na altura tambe di e proceso cu lo tuma luga pa loke ta trata e tumamento di oranan back pa luna.
Kedando ariba e mesun topico, Sr. Maduro a informa cu sindicato SADA a ricibi un carta diamars anochi laat, den cual Minister President a manda un comunicado pa tur e hefenan di servicio. Den esaki, e ta admiti cu e posicion cu e sindicatonan a tuma ta un posicion cu ta cay bao di e capa di accion y cu no por tin repercusion disciplinario ariba ningun hende cu kier haci uso di e derecho ey.
“Contrario na locual Minister President a bisa luna pasa den un carta, cu esunnan cu bay reduci nan oranan lo bira plichtverzuim (negligencia den e cumplimento di deber). Eynan mi ta bisa cu ta jammer con Minister President e momento ey na januari ta purba trece miedo den esnan cu kier haci uso di nan derecho. Pero mi ta kere cu despues cu e lo a ricibi conseho cu locual el a indica desde comienso, mi ta kere nan a conseh’e corectamente y bis’e pa hacie cla cu e accion aki no por tin consecuencia disciplinario pa ningun trahado di e sector publico, ni maestronan, mientras cu e ta cay bao di e capa di welga, pasobra e ta un accion”, Sr. Maduro a subraya.
Na mesun momento el a enfatisa cu e otro sindicatonan cu a ricibi citacion di hues ya caba a indica pa suspende of pone pauze na e ehecucionnan di nan accion. Pero den caso di sindicato SADA, nan no a haya un tipo di citacion ainda, pero esey no ta descarta cu nan por ricibie. “Nos a yega di hay’e caba den pasado y esey no ta algo cu ta spanta nos”, Maduro a bisa. “Nos ta keda para pa nos principionan y nos pensamento pa loke ta trata derecho, pero eynan bo ta wak con Minister President no ta informa pueblo bon; e ta purba intimida e trahadonan cu kier haci uso di nan derecho di welga”.
Durante e conferencia, Sr. Maduro a manda un mensahe specificamente pa e trahadonan di Cuerpo di Aduana, tanto miembro y no miembro di sindicato SADA. “Si acaso bo ta sinti cu bo derecho ta wordo trapa pa loke ta trata e recorte salarial di 12.6% y bo ta sinti cu bo tin tur derecho di manifesta bo malcontento y tuma e 22 oranan aki pa luna, bo por haciele libremente. Solamente cu pa e momentonan aki, e ta ‘no work no pay’, pero no por tin niun accion disciplinario di bo dunado di trabao”.
El a señala tambe cu den su opinion lo ta bon tambe pa Minister President sali bisa cu pa tur esnan cu kier haci uso di e derecho di accion, manera e mes a pone den su carta, no ta bay tin ningun repercusion disciplinario.
Diabierna mainta sindicato SADA entre otro a ricibi un invitacion pa un reunion cu Conseho di Minister, unda a discuti e decision di Conseho di Minister di Reino pa no elimina e recorte salarial 12.6%. Sr. Maduro a declara na portal di noticia 24ora cu di nan banda, na momento cu nan a ricibi e invitacion nan a delibera internamente y a busca conseho, y e posicion tabata hopi cla di parti di directiva.
“Nos no ta wak e necesidad pa bay den un reunion, pasobra mi ta kere lo bay bin ripiticion. Y mi ta kere di parti di SADA, ya nos ta canando bay dilanti pa loke ta trata nos punto di bista, cual ta traha conforme locual nos ta wordo paga. Miembronan tabata dudidelijk cu nos no ta bay forma parti di intercambia porcentahenan den salario pa ATV-dagen of vakantieuitkering of recorte riba premies. Pa nos esey no ta un discusion cu ta necesario pa hiba un biaha mas, y pa e motibo ey, nos a hacie cla cu nos ta bay sigui cu ehecucion di nos plan responsabel. Y mi ta kere pa otro siman nos lo cuminsa ehecuta esaki”, Maduro a indica.
