(ElNacional) – Rector di Conseho Nacional Electoral (CNE), Enrique Marquez, a manifesta e intencion di convoca eleccionnan den e entidadnan unda alcaldenan chavista a keda aresta pa corupcion.
“E ley ta bon cla pa locual ta trata eleccionnan pa scoge un alcalde nobo. Tin un ausencia absoluto di alcaldenan ya caba den ehercicio”, Marquez a bisa durante un entrevista.
El a señala cu e unico manera di reemplasa e ausencia na e momentonan aki ta a traves di eleccionnan nobo. “Articulo 87 ta establece esey. Nos mester prepara pa convoca eleccion.”, el a enfatisa na Union Radio. “Den 30 dia mester convoca un proceso electoral nobo”.
E alcalde chavista di e municipio Jesus Maria Semprun di estado Zulia, Keyrineth Fernandez, a wordo deteni diabierna 28 di januari pa presunto delitonan di trafico y posesion di droga. E mesun dia e alcalde di e municipio Independencia di estado Anzoategui, Carlos Rafael Vidal tambe a keda deteni. Den su caso door di presuntamente lidera un grupo delincuente dedica na e comercialisación ilegal di combustibel.
Diamars 18 di januari, e Minister di Petroleo di e administracion di Maduro, Tareck El Aissami, a anuncia cu nan lo pone den marcha un plan “antimafia” pa combati e desviacion den e distribucion di combustibel.
Di su banda, Tarek William Saab, a señala cu Ministerio Publico lo atribui e delitonan di terorismo, contrabanda, uso ilegal di bienes publico, corupcion y asociacion, tanto contra Vidal como tambe na 12 otro persona involucra.
