Manera anticipa, gobierno di Reino a rechaza e propuesta di gobierno di Aruba pa reduci e recorte di salario di empleado publico y entidadnan estatal di 12,6%. Esaki ta keda condicion fiho pa Aruba por haya sosten di liquidez di Hulanda. Esaki tin varios implicacion pa gobierno di Aruba. Pa cuminza lo mester adapta presupuesto 2022, pasobra a introduci den esaki caba e reduccion te 50% di e 12,6%, cu consecuencia cu mester kita e suma ey di presupuesto. A acorda sí cu gobierno di Aruba por duna otro contenido na e 12,6%, basta e suma ‘onder de streep’ ta cuadra, segun e acostumbrado tradicion Hulandes. Tanto Promer Ministro como ministro plenipotenciario a keda contento cu tin un acuerdo riba e otro dos asuntonan pendiente, cu ta e protocol, cu ta bira dos aña, y e Nota di Cambio di e proyecto di ley di COHO.

Pero, e ora e pregunta ta: pakico no tin un acuerdo ainda y a haci cu atrobe a move e aprobacion di sosten di liquidez pa e siguiente reunion? Esey tin segun nos un motibo masha simple: unda e presupuesto aproba 2022 a keda? No por kere cu Hulanda ta bay aproba un suma di apoyo di liquidez sin cu tin un presupuesto aproba. Na 2020, na momento cu Covid-19 a cay aden na maart, tampoco tabatin presupuesto aproba. A core coregi presupuesto, loke tabata necesario tambe, laga esey ta bon cla, y despues a logra e aprobacion di e sosten. Nos ta den e mesun situacion ainda, cu un proyecto di ley di presupuesto cu supuestamente ta na Raad van Advies pa conseho. Con e negociacion cu sindicatonan lo bay ta depende di varios factor. Un cos ta sigur y esey ta cu e sindicatonan a laga sa bon cla cu nan ta desea solamente cumplimento cu e pago completo, no 50% so. Esey a haci cu nan no a reacciona riba invitacion di gobierno pa papia ayera, pero ta warda resultado di e casonan den corte otro siman.

En todo caso, pa loke ta e asunto di e sosten di liquidez, esey ta keda pa proximo reunion di Conseho di Ministro di Reino aki tres siman, mientras cu dia 10 di e luna aki van Huffelen ta na Aruba pa siña conoce e isla, pero sigur tambe pa tene algun reunion importante cu gobierno. Un di e puntonan pa trata ta e protesta di gobierno di Aruba contra e decision di ayera pa rechaza esaki. Lo e trece un biaha mas dilanti cu, manera a anticipa, tabata demasiado pa pidi Hulanda bay di acuerdo cu Aruba (y e otro islanan) no mester cumpli na 2022 ainda cu e normanan di presupuesto estableci, y ademas di banda di Aruba ta pidi pa kita e recorte riba salario. Cu un deficit cu ta casi 300 miyon florin caba, Hulanda mester ta ‘gekke Henkie’ pa bay di acuerdo, y esey tabata mas cu claro di antemano.

Awor, e bala ta back riba cancha na Aruba, tanto pa gobierno como sindicatonan cu ta cla pa bay den lucha den e asunto aki. Pa gobierno, e acuerdo cu por duna otro contenido na e 12,6% ta parce di a crea un base oportuno pa negocia cu e sindicatonan un otro set up di e paquete di medida, basta cu finalmente e efecto financiero ta 12,6%. Esey ta mustra manera un ilusion cu e actitud di e sindicatonan, pero e problema no ta solamente e lucha sindical. Tras presupuesto y problema di 12,6% ta sigui e reformanan cu ta bay yega den fase di ehecucion. Aki ta unda por spera e mayor contratiempo. Nos por a sinti algo di esey caba cu e medidanan cu a anuncia den e pago di un contribucion propio, cu a bay den un ambiente relativamente tranquil. Por ta cu oposicion ta keto riba esaki pasobra nan mes no tin alternativa?

Tambe e decision Hulandes ta marca cu bastante claridad con e ambiente actualmente ta entre madre patria y Aruba y e otro islanan. Hulanda ta perdiendo pacenshi y esun cu a kere cu e yegada di un secretario di estado nobo lo a trece un alivio, pasobra e persona ey lo mester tuma tempo pa siña conoce e materia y lo no drenta cu arma den man, no conoce e cultura gubernamental Hulandes di continuacion di gobernacion. E rechazo di e propuesta di kita e 12,6% for di mesa ta e mihor ehemplo cu cerca nan no ta importa tanto ken ta na timon, nan ta ehecuta maneho a largo plazo y e maneho ey ta cu e islanan ta bao di supervision financiero y, desde Covid-19, tambe bao supervision pa garantiza reforma structural. Naturalmente cu den e crisis na 2020 e gobiernonan insular a bisa cu nan ta di acuerdo cu e reformanan cu Hulanda a propone/impone, pero henter e trayectoria despues ta un secuencia di slowdown, retrasa, tranca…. Un señal cu no ta existi e disposicion real pa traha riba e reformanan necesario? Por ta cu ta esey e secretario di estado kier bin explora pa su mes otro siman?

Ta papia hopi di perdida y recuperacion di autonomia. Esey ta bon, pasobra ta reconoce cu tin un actor cu a actua limitando nos autonomia. Awor, keda bringa cu e actor superior ey, cu ta tambe bo ultimo recurso financiero, ta yuda nos logra nos recuperacion?