Ayera tardi, algun miembro di personal di Guarda Nos Costa a pone trabao plat pa algun ora, pa motibo di malcontento relaciona cu caso di un inmigrante ilegal.

Melvin Ras, kende ta shopsteward di SEPPA na GNC, a conta portal noticiero 24ora cu tabatin un persona cu tabata kedando ilegalmente na Aruba. Polis di frontera a detene e persona y segun el a conta, a cana e proceso pa deportacion, unda cu hasta e persona a aborda e avion pa bolbe su pais di origen. Sinembargo, na e momento ey e persona a tuma un yamada, durante cual el a ricibi instruccion pa ‘tosa y bisa cu e tin covid’ pa baha for di e avion back.

Segun Ras a conta 24ora, ta minister di Labor, Energia y Integracion, Glenbert Croes a firma un VTA [red. voorlopige toelating Aruba, pues un permiso temporal] pa e persona por keda na Aruba. Na e escena tabatin un señora, cu segun e relato, ta un ambtenaar y ademas ta famia di e persona en cuestion. E señora aki segun 24ora tabata campañador pa minister Croes, y ta e señora aki lo a ‘pone presion’ riba e minister pa soluciona problema di miembro di su famia pa evita deportacion na Santo Domingo.

Algun trahador di Guarda Nos Costa tabata para pafo como protesta, dunando declaracion na prensa, y mientras tanto e señora ariba menciona tabata grita y purba di mustra documentonan na e reportero.

Ras a conta e noticiero cu nan ta disgusta ‘di e forma con nos ta wordo trata’.
“Nos ta haci nos trabao conforme di ley. A wordo firma un landspakket door di prome minister di Aruba. Den e landspakket tin regelsnan cu ta bisa pa proteha nos mercado laboral. Kiermen nos localnan mester bay na prome lugar”, Ras a bisa. “E persona aki tabatin un uitzetting, e ta ilegal na Aruba, el a wordo rechtmatig getoetst door di hues comisario, el a bay un caso, el a perde un caso; ayera nos a pone e persona aki na aeropuerto riba avion.”

Ras a continua: “Su suegra a instruy’e via telefon pa e tosa abordo di e avion, bisa cu e tin Covid. E capitan a bah’e for di avion pa seguridad di e pasaheronan.”

Sinembargo, e situacion no a caba eynan. Segun Ras a conta, na aeropuerto e persona a bay insulta y menasa un trahador di GNC bisti na uniform. “Y esaki ta inaceptable.”

Ras a haci un yamado na minister Rocco Tjon, di Husticia y Asuntonan Social pa presenta na e lugar, ya cu ‘abo ta nos hefe’. “Esaki no por. Nos no por tolera e cosnan aki mas. Menasa e colega cu morto, dal e colega den aeropuerto. Tin camaranan cu a filma di tur caminda. Hoofd van Dienst, meneer Ho tambe ta na altura di e situacion aki.”

Director di GNC, Richard Krammers a bisa cu e personal a informa su persona tocante e suceso. El a agrega cu e VAT tabata basa riba un ‘vinculo excepcional’ cu Aruba. El a bisa ademas cu e suceso a ‘cay den mal tera pasobra no ta prome biaha. Nos a haya algun di e situacionnan aki caba di e situacionnan aki caba algun tempo pasa. Y ya caba eseynan tabata cay den mal tera.” El a bisa cu e personal cu ta traha duro ta sinti cu nan trabao ta ‘hibamento di awa lama’. Krammers a bisa cu el a autorisa pa su personal eherce nan derecho di manifestacion.

Contestando pregunta si Departamento di Inmigracion, Dimas tin un rol den e VAT cu a otorga na e persona, Krammers a bisa cu ‘en principio no’. “Esaki ta un decision netamente di e minister encarga di Integracion.

Bon Dia Aruba a purba di tuma contacto cu Tjon pa comentario riba e situacion. Su vocero a contesta cu na e momentonan ey, no tabata posibel pa duna comentario riba e situacion.

Tampoco a ricibi un contesta inmediato di minister Glenbert Croes.

Potret via 24ora.