Fundacion Centro Famia Piedra Plat a lansa nan website nobo

Durante un conferencia di prensa ayera tardi Fundacion Centro Famia Piedra Plat (FCFPP) a lansa nan website y billboard nobo. Sr. Adri Berg, presidente di FCFPP a elabora ariba e metanan di e fundacion y tambe e proyectonan cu nan tin actualmente. Minister di Enseñansa y Deporte, Sr. Endy Croes y Minister di Husticia y Asuntonan Social, Sr. Rocco Tjon tambe tabata presente y alabes a ricibi un tour di e facilidadnan di e fundacion.

Sr. Berg a conta cu e fundacion a wordo lanta door di su persona y Dr. Kelly cu tabata e dokter di cas di e bario di Piedra Plat. Nan a tuma e iniciativa hunto cu e apoyo di Iglesia Piedra Plat y hende- y famianan di bario y asina nan a lanta e fundacion pa sirbi e comunidad di Piedra Plat, Paradera y vecindario.

El a splica cu como fundacion nan tin tres meta. E prome ta establece un centro comunitario na Piedra Plat ariba un base di norma y balornan cristian. Segundo ta pa stimula famia como e fundeshi di nos comunidad, y tercer ta pa promove desaroyo social, fisico, educativo, cultural y talentonan di tur persona di tur edad.

“Esaki ta un proceso. Nada no ta cay for di shelo, bo mester traha pe y esaki nos a bin ta desaroya. Actualmente nos ta concentrando hopi mas ariba mucha y hubentud. Actualmente nos tin un averahe di 170 mucha y hoben ta bishita nos centro semanalmente. No tur hunto, den diferente grupo. Apart di esey nos tin tur e boluntarionan cu ta yuda nos”, Sr. Berg a indica.

Sr. Berg a conta cu e fundacion tin tres proyecto activo actualmente. Un di e proyectonan y cu tin mas o menos 15 aña caba di existencia ta Club Oansa. Oansa ta un club pa mucha cuminsando for di kleuterschool te cu muchanan di 1ste klas di ciclo basico y ta un club cu ta activo durante henter e aña escolar. E club ta contribui na e desaroyo social di e mucha, nan ta haci deporte cu e muchanan y Sr. Berg a enfatisa cu e deporte cu nan ta haci ta deporte cu nan ta siña algo for di dje, un deporte cu tin un educacion su tras. Club Oansa ta reuni tur diabierna y nan tin un averahe di 50 mucha cu ta participa y tin 10 lider pa yuda.

Otro proyecto, el a menciona y esun principal segun Sr. Berg ta e Centro Educativo Creativo (CEC) y esaki ta e programa mas grandi cu e fundacion tin. El a splica cu CEC ta asisti hobennan den nan formacion y desaroyo. E ta un programa pa despues di scol pa muchanan di scolnan primario y secundario.

“Den nos comunidad hopi hende por tuma nota di e cantidad di hobennan den scolnan secundario cu no ta alcansa nan aña escolar. Na CEC nos tin un programa cu nos a desaroya cu ta dirigi pa e hobennan aki y e enfoke ta mas tanto ariba hobennan di menos recurso. Nos prijs ta hopi abou pa asina nos por yuda e muchanan cu ta bon di casnan di menos recurso”, el a agrega.

CEC ta funciona cuater biaha pa siman, dialuna pa diahuebs, di 1:30 pa 5:30 di dialuna y actualmente tin 60 mucha cu ta participa diariamente na e programa. Tin 8 docente y cuater assistent cu ta yuda cu e materianan cu ta wordo duna y nan ta traha den cooperacion cu otro instancianan.

“Samenwerkendefondsen y CEDE Aruba ta support nos financieramente durante e ultimo cuater añanan pa asina nos por draai e proyecto aki y nos por bisa cu satisfaccion grandi exitosamente pasobra nos tin contacto cu e docentenan di scol y mayoria di nos muchanan ta pasa klas y ta bay bon. Kiermen nos ta hopi contento”, Berg a expresa.

Cas di musica a nace di programa CEC, di e parti cu ta encera musica cu e muchanan ta haya. Sr. Berg ta conta cu e mayornan a cuminsa expresa nan interes tambe pa les di musica y asina otro hendenan tambe tende di lesnan di musica y mustra interes den e lesnan di musica. Asina e fundacion a desaroya e programa y actualmente tin 64 persona, muchanan di 6 aña te cu adultonan di 80 aña, cu ta tuma les di musica na e fundacion. Nan ta duna les di cuarta, drum, guitara, piano, canto y baho.

Sr. Berg a remarca cu e parti di finanzas semper ta keda un reto pa e fundacion. “Gobierno tin reto, famianan tin reto y nos fundacion tambe tin reto. Pero nos como directiva ta hopi consciente con nos mester handle e entradanan cu nos ta haya. Y nos meta ta, mas tanto cu ta posibel, nos sa cu nos no por yega e 100%, pero pa nos por sostene nos mes financieramente, pa nos mes por cubri nos gastonan”, el a expresa.

Minister Tjon a dirigi algun palabra durante e conferencia di prensa y a bisa cu tipo di programanan asina ta haci un diferencia den comunidad. “Mi ta kere boso por ta hopi orguyoso y vooral e parti cu boso ta brinda oportunidad na muchanan di menos recurso, esey tambe ta haci un gran diferencia. Mi a traha hopi aña den e parti di husticia y hopi biaha pa falta di tipo di programanan aki nos hobennan ta bay e caminda robes tambe”, el a expresa.

“Mi ta hopi orguyoso di e trabou cu boso ta haciendo y esey ta e motibo tambe pakico Gabinete Wever-Croes II ta traha hunto cu CEDE den un forma structural. Hopi fondo di nos parti tambe ta wordo poni disponibel netamente pa entre otro tipo di programanan asina por ta un realidad”, el a agrega.

El a sigui bisa cu e fundacion por ta un ehempel tambe pa hopi otro fundacionnan y cu e trabou organisa ta marca diferencia. “Ora bo ta bon organisa tur e cosnan aki por bira un realidad”. El a señala tambe e importancia di tin boluntarionan cu ta dispuesto pa haci e diferencia.

Minister Tjon a menciona tambe cu hunto cu Minister Endy Croes, tin un concepto cu nan ta trahando riba dje cu nan a yama “Barionan Sigur” cu practicamente, segun el a indica, FCFPP por fungi como ehempel pa e programa ey. “E esencia di e programa ey ta crea responsabilidad institucional, inverti den e parti fisico y hopi importante e after-school programs”.

Minister Croes a remarca tambe cu e programanan di e fundacion ta fit hopi bon den e vision di Gobierno di Aruba y cu e fundacion por conta den futuro cu nan sosten. “Mi kier felicita e fundacion, felicita CEDE Aruba, felicita e boluntarionan tur cu ta duna di nan parti pasobra un sociedad no ta gobierno so, un sociedad no ta minister so of parlamentario so, un sociedad ta nos tur y na final di dia Aruba ta di nos tur y nos tin cu percura pa brinda oportunidad na e chikitonan tambe pa un miho mañan”, el a expresa.