Tussenrapport Doorlichting Onderwijs tin 13 recomendacion pa mehora calidad di Enseñansa; Kier introduci central di data entre Scol y Directie Onderwijs

Ayera mainta, minister encarga cu Enseñansa, Endy Croes a ofrece un conferencia di prensa pa asina trece informacion tocante e Tussenrapport Doorlichting Onderwijs. E rapport final ta bay keda na luna di mei di e aña aki.

Pa cu esaki, Croes a cuminsa splica cu for di november di aña 2020 ora Aruba a firma un protocol cu Hulanda cu ta trata e parti di Landspakket, tin cu haci reforma den diferente parti pa di forma ey Aruba por ta mas fuerte.

E rapport aki ta forma parti di e protocol firma, segun loke Croes indica ,unda cu na april 2021 Inspectie di Hulanda conhuntamente cu Inspectie di Aruba a cana un trayectorio pa haci un doorlichting completo den area di enseñansa. Durante aña 2021 e dos Inspectie a haci e doorlichting aki, a tene reunion cu diferente stakeholder y instancianan cu ta pertenece na enseñansa. Ademas nan a revisa rapportnan existente caba na unda cu na final di luna di november nan a produci e Tussenrapport aki.

Na momento cu e rapport a keda conoci, Gobierno di Aruba tabatin seis siman pa duna un reaccion riba dje. Croes a menciona cu despues di e reaccion cu a manda na Hulanda, tin palabracionnan entre Aruba y Hulanda pa loke ta trata e proceso, con pa cana y por publica e rapport final, cu segun el a haya informacion, e ta bay por keda cla na luna di mei cu algun cambionan cu ya caba a wordo concretisa.

“Pero esaki ta e guia, esaki ta e compas, pa nos por cumpli cu e Landspakket. No ta Onderwijs so, sino ocho diferente seccion cu a pasa den doorlichting”, el a sigura.

Croes a splica cu doorlichting a cuminsa manera “un potret” cu nan a saca con enseñansa ta actualmente. Nan a duna 13 recomendacion riba cada tema riba kico Aruba tin cu haci, e proceso cu mester haci pa e recomendacionnan ey haya atencion, pa asina por mehora e sistema den su totalidad den enseñansa.

E recomendacion number un ta indica “organiseer een betrouwbaar en duurzaam registratiesysteem voor kengetallen”. Recomendacion dos te cu number ocho ta trata di e mehoracion den enseñansa y for di recomendacion number nuebe te cu diestres ta trata di mehoracion den e sistema.

“E rapport aki ta hopi cla, tur diestres punto cu nan a skirbi nos por reconoce nan di un of otro manera di algun manera”, Croes a expresa.

Den un di e recomendacion tambe ta papia di data, na unda cu Croes a comenta cu nan kier bin cu un data central, caminda tur scol por transferi nan data mediante un interfase pa Directie y Inspectie Onderwijs pa asina nan por tin esey pa cuminsa canalisa e parti aki. El a bisa tambe cu tin algun scol cu ta mas atrasa cu otro.

Di mesun forma, el a indica cu mester actualisa leynan y esnan cu ta falta ta bay wordo traha cu e memorie toelichting. Ademas a señala cu nan a pone un comision encarga cu un profesor di Hulanda specificamente den e plataforma di Aruba pa tur e departamentonan ta bay cuminsa traha riba esey.

El a indica cu esaki ta tuma su tempo y por tarda un aña y mey. “Nos kier mira atras aki cuater aña cu nos a cumpli parcialmente cu hopi di e puntonan aki cu ta importante den nos vision di plan di maneho Enseñansa den Transicion cu nos a presenta diamars ultimo”, el a bisa.

Nan a scoge cuater prioridad pa aña 2022 segun loke el a menciona pa motibo cu nan mester di financiamento y no por logra tur den un aña, den esaki nan a scoge pa data, actualisa leynan, eficiencia financiero y pa ultimo unda Croes a sigura cu e kier haci un debate nacional pa loke ta trata taalbeleid y pone tur stakeholders di Enseñansa pa hunto nan por tuma decisionnan pa loke ta trata e taalbeleid.