Den marco di recuperacion di Aruba su economia, ayera anochi prome minister Evelyn Wever-Croes a anuncia algun flexibilisacion di medidanan pa loke ta trata pandemia Covid-19 cu lo drenta na vigor awe diabierna 04 di februari 2022.

Como parti di e proceso aki y di Exit Strategy prome minister a señala cu Aruba ta den un fase cu ta importante pa cada persona na Aruba siña biba cu Covid-19, pa motibo cu lo keda pa un tempo ainda pero comunidad mester biba cune.

“Medicamente y huridicamente no ta hustifica mas pa nos mantene medidanan stricto cu nos tin na Aruba” ta p’esey cu prome minister a haci un apelacion na comunidad pa sigui cuida na unda cu reglanan di higiena ta keda na vigor como laba man frecuentemente, haci uso di handsanitizer, tene distancia y uso di tapaboca ta keda obligatorio ora cu ta paden di establecimentonan.

“Esey ta lo cual nos mester haci, specialmente aworaki cu gobierno ta bay flexibilisa, ohala cu nos por tuma e flexibilisacion aki na serio pa despues no mester bin back cu medidanan” prome minister a sigura.

Asina mes el a indica cu e flexibilisacion aki “no ta un fiesta” na unda cu tur persona mester keda alerta, tambe el a pidi na companianan y establecimentonan pa mantene tur e reglanan cu ta keda na vigor, distancia y higiena pa asina Aruba por ta sigur y cu no mester yega na momento cu tin cu cera economia y afecta e pais atrobe, vooral establecimentonan comercial.

Pa loke ta trata e cambionan prome minister a informa cu for di awe 04 di februari ta drenta na vigor lo siguiente:

-Orario di ciere a ser cambia pa 1or di marduga y pa Casino 2or di marduga.

-Cantidad di hende na mesa den sector di Horeca ta cambia pa 10 persona na mesa.

-Encuentronan social ta tuma luga pafo den aire liber cu un maximo di 500 persona cu por participa, si ta paden ta bira 300 persona, manteniendo distancia.

-Entretenimento, bandanan por ta riba scenario sin limitacion di musiconan y e prohibicion di baliamento ta wordo elimina.

Tambe tin algun otro medidanan cu a ser cambia y cu por haya nan via e website www.gobiernodiaruba.aw , e medidanan cu lo sigui keda na vigor ta cu maneho di entrada pa Aruba ta continua, personanan mester a haya e tres vacuna of mester presenta un prueba negativo di Covid-19 y esun menciona caba como uso di tapaboca y mantene distancia.

Pa finalisa, el a indica cu gobierno ta halando un stap aworaki pa asina comunidad sigui cuida “nos como gobierno no tin ni un hustificacion a base di nos cifranan di caso activo, ni a base di cuanto hende tin na hospital, nos no por keda cu e medida aki”, prome minister a expresa.

.