Funcionnan halto no ta hayando permiso: Cu ta indispensable pa por opera

Den e demanda actual di personal mas tanto atencion ta bay na e categorianan di empleo menos bon paga. Sin embargo, tin cierto funcion mas halto, na nivel intermedio pero sigur tambe na nivel di HBO/WO, unda varios empresa, y no solamente den sector hotelero, ta confronta problema grandi pa cu recluta hende pa e funcionnan cu nan tin habri.

Bon Dia Aruba a hiba conversacion cu varios empresa, cu bao condicion di anonimato a duna di conoce cu e stancamento di trabao na DPL y Dimas, durante e pandemia y te awor, a hinca nan den problema grandi.

Pa cierto funcion halto simplemente no tin hende ta cana rond sin trabao na Aruba y necesariamente mester importa hende cu e educacion specifico ey, y cu experiencia preferiblemente, pa por eherce e funcion habri.

Un di e personanan entrevista ta conta: “ Imagina cu bo a bolbe bo pais y a build up un negoshi ‘from scratch’ bo so, y awor bo tin un empresa mediano cu varios funcion na nivel di HBO/WO. Mi no ta haya hende na Aruba, pero mi no ta haya nada regla tampoco pa hende bin di exterior. E departamentonan ey (Dimas, DPL; red.) ta lubida cu pa cada stranhero di nivel halto mi ta empleando tres pa cuatro hende local cu ta hiba un bon salario cas fin di luna. Ta nan pan tambe ta na peligro si nos no por opera pasobra e persona stranhero clave no t’ey.”

Riba pregunta di Bon Dia Aruba tocante posibilidad di laga hende no diploma haci e trabao, e persona ta bisa: “Esey absolutamente no ta un alternativa. Nos ta den un ramo unda si mi laga hende no certifica haci e trabao, otro autoridad ta bin y ta cera mi negoshi, y cu nan razon. Ademas mi ta haya problema grandi cu mi seguro, cu no ta cubri demanda di daño y perhuicio si resulta cu mi a laga personal no autoriza haci e handelingnan ey. Ademas e lo ta un berguenza pa mi mes; con mi ta bay hustifica trabao asina dilanti mi clientenan, cu ta paga bon placa pa haya trabao profesional haci. Mi no sa si e hendenan ey ta comprende e cos aki.”

Segun un persona cu experiencia den e materia aki, tambe bao condicion di anonimato, e tardanza pa start up trabao despues di e paro general di operacion na Dimas y DPL, tabatin consecuencia grandi pa hopi empresa cu a perde nan empleadonan stranhero cu a keda sin permiso, pero no a logra recluta hende local tampoco pa reemplaza nan. Esaki, sigur den tempo di recuperacion economico, ta un desbentaha grandi cu ta den man di gobernacion pa resolve.