(EFE) – Polis Federal di Brazil a conclui cu presidente Jair Bolsonaro a comete delito ora a publica rapportnan secreto pa desacredita e sistema electoral di e pais, pero a laga un posibel acusacion den man di Fiscalia General.
Segun un documento manda diaranson ultimo na Corte Supremo cu ta investiga esaki, e publicacion di e documentonan riba fraude cu a keda desmenti na eleccionnan di 2018 tabatin como “proposito” e “publicacion di informacion falso, cu consecuencianan dañino pa administracion publico”.
E documentonan aki tabata forma parti di un investigacion di Polis Federal riba un atake informatico na sistema di Tribunal Superior Electoral cu a sucede na mita di 2018, lunanan prome cu eleccionnan di october di e mesun aña, cual Bolsonaro a gana y cu no a keda afecta pa e incidente aki.
E lider di ultraderecha a duna di conoce e documentonan na augustus di aña pasa, aunke nan tabata di caracter secreto, den marco di un campaña contra voto electronico, cu Brazil a adopta na 1996 y cu te awor no tabata obheto di niun denuncia di fraude, pero cu segun e mandatario, ta faborece trampa.
E magistrado Alexandre de Moraes, di Corte Supremo, a inclui e asunto aki den un proceso di publicacion di noticianan falso y atakenan contra institucionnan y a determina cu Polis Federal ta bay investiga e actitud di e mandatario.
E mesun hues siman pasa a duna orden cu Bolsonaro mester a duna un declaracion na Polis Federal, despues cu el a nenga enfaticamente y a indica pa diabierna ultimo pa e bay na e institucion.
Sinembargo, e presidente no a asisti y a señala su “derecho na ausencia”. Aunke ainda no a aclaria e asunto den e parti huridico, Supremo ta bay tin mester di analisa e consecuencianan na momento cu un hefe di Estado ta ignora un orden hudicial.
Documento realisa pa Polis Federal ta indica cu a pesar cu a comproba cu Bolsonaro a comete un “delito”, un posibel acusacion formal lo mester ta presenta pa Fiscalia General, pa e condicion di fuero cu un presidente den pleno ehercicio ta posee.
