Banco Central di Aruba a publica e cifranan mas recien pa loke ta confiansa di consumidor. Esaki ta pa e ultimo kwartaal di 2016 unda ta mustra cu e indice a crece levemente cu 0,1 punto, pa 96,1
Tambe consumidornan a evalua e situacion actual menos negativo compara cu seis luna pasa ya cu e indice a subi cu 1,7 punto di indice te na 96,5. Sinembargo, e futuro expectativanan di consumidor tabata un poco mas abou ya cu e indice di expectativanan a empeora di 99,6 te na 99,3 compara cu e periodo anterior.
Menos perspectiva pa empleo
Consumidornan tabata mas neutral riba e futuro cercano den e di cuatro trimester di 2016. E grupo di consumidornan cu ta spera cu nan condicionnan financiero personal lo permanece igual a subi di 36,1 porciento te na 40,8 porciento. Esaki tambe tabata e caso den nan sentimentonan di, respectivamente, condicionnan di negoshi pa futuro (di 33,7 porciento te na 49,3 porciento) tambe den e posicion financiero di gobierno pa futuro (di 28,8 porciento te na 39,5 porciento) y e expectativanan di empleo (di 23,8 porciento pa 29,o porciento).Sinembargo, mas consumidornan ainda ta kere cu e expectativanan pa empleo lo empeora (di 44,9 porciento pa 44,5 porciento).
Interes pa hipoteca ta baha atrobe
E indicenan di expectativa di prijs y custumber di compra di consumidor a empeora den di cuatro trimester. E indice di expectativanan di prijs a baha te na 90,2 den e trimester prijs di coriente, e porcion di consumidornan indicando cu prijsnan lo ta mas abou den e siguiente seis luna a baha di 2,8 porciento te na 0,8 porciento. Finalmente, mayoria di consumidornan a indica cu no tabata apropia pa cumpra un auto (66,0 porciento), aparatonan grandi (55,5 porciento), bay riba vakantie (40,8 porciento) haci un prestamo (63,8 porciento) of un hipoteca (72,8 porciento).Maske tin un crecemento consistente den hipoteca, solamente 6,3 porciento a indica cu ta apropia pa haci un hipoteca, kibrando e resultado mas abou di 7,3 porciento e encuesta cu a wordo registra den e trimester anterior. E resultadonan aki a baha e indice di habito di consumo pa un record di 94,3.
