Den un recado di prensa di Promer Ministro Wever-Croes, cu ta aparece tambe den nos edicion aki, a enfoca riba e asunto di e recorte salarial di 12,6%, di cual sindicatonan representando empleado publico y personal di entidadnan estatal ta haya cu mester elimina esaki completamente. Gobierno di Aruba a pone e asunto den man di gobierno di Reino, ya cu mantene e recorte pa e aña aki ta un condicion pa continuacion di e ayudo financiero Hulandes, cu ta clave pa gobernacion di Aruba sigui opera.

Mañan, diabierna, Conseho di ministro di Reino lo atende e asunto aki, cu probablemente un resultado negativo pa gobierno y sindicatonan. Ta dificil pa convence Hulanda cu, teniendo un deficit riba presupuesto di centenares di miyon, ta importante fia extra placa pa paga empleado publico full salario. Y si e contesta ta negativo, esey ta pone e bala back riba cancha di gobierno local, cu mester atende eventual accion sindical, cu e instrumentonan legal na su disposicion. Con esey lo bay, ta incierto ainda.

Ademas, tin otro asunto pendiente cu tin di haci cu e ayudo financiero, pero tambe cu continuacion di e supervision financiero, cu den diferente forma ta presente desde 2014. Actualmente tin algun asunto pa resolve, cu ta e protocol tocante supervision financiero, cu en todo caso mester yena e bashi legal actual despues cu e anterior protocol a vence na fin di 2021. E protocol aki di cualkier manera mester ta vigente te cu e ley di Reino pa Aruba keda cla y ta na vigor. Esaki ta un punto menor pa cual mester tin solucion na mesa, si no a yega na esaki caba.

Banda di esey, hunto cu e otro islanan (Curaçao y Sint Maarten) y Hulanda, mester atende e ultimo diferencianan pa e proyecto di ley di Reino pa e organismo (COHO), cu mester bay dirigi e reformanan, por bay cana su caminda den parlamento Hulandes. Di parti Hulandes tabata spera cu por a logra esaki caba na december 2021, ora a pospone e reunion di Conseho di Ministro di Reino, pa despues pospone un biaha mas na januari ultimo.

Faltando solamente un dia pa e reunion di Conseho di Ministro di Reino tuma lugar, ainda no tin claridad riba e puntonan aki, mientras tabatin consulta recientemente entre e cuatro paisnan. Principalmente e leynan di Reino ta importante pasobra nan lo determina e forma den cual den proximo añanan gobierno di Aruba lo mester bay traha riba recuperacion financiero y implementa e multiple reformanan cu en principio a acorda caba cu Hulanda, y cu ta hayando ehecucion – parcial – via e Uitvoeringsagenda. Sin embargo, si no ta yega na formalizacion di e leynan, esey no ta implica final di e supervision Hulandes, pero esaki lo mester bay haya otro forma. Lo ta bon si ta dedica mas atencion, tambe den publicidad, na e aspectonan aki cu ta bay hopi mas leu y profundo cu e asunto di reduccion of no, di salario di un categoria privilegia, compara cu e empleado average den sector priva.