Semper ora presenta un problema den gobernacion, ta core pone uncomision pa studia e caso. Esey no ta asina cerca nos so; e ta algo universal. Awor, no ta bisa esaki pa ridiculiza e asunto, pasobra e nombramento di e comision riba su mes por ta e inicio di un bon solucion tambe. Semper ta mihor pa studia algo di tur banda y haci un bon evaluacion di e posible opcionnan. E punto ta kico realmenteta e proposito cu e comision: e ta un intento serio pa avanza den e materia, o e ta e vehiculo perfecto pa kita critica por lo pronto for di caminda, cu e argumento cu no por bisa nada ainda, pasobra ‘e comision mester por traha tranquilamente’. Un mandatario cu ta realmente interesa den yega na solucion lo pone hopi presion riba esnan nombra eyden, pa nan bin mas pronto posible cu solucion practico y factible.Den e situacion ey e tin tambe e escogencia di mantene un canal di comunicacion habri cu prensa, unda regularmente tin un update tocante e progreso di e trabaonan. Ora e relacionnan ey cuminza amarga y e mandatario ta cuminza bira mas defensivo ora prensa puntra pa e avancenan den e trabao, ya bo sacuant’or tin… ey por cuminza sospecha cu e comision ta sirbi mas como un pantaya pa kita atencion pa loke berdaderamente ta tumando lugar.

Pero nos no mester papia solamente di e experiencia en general. Por menciona caso unda por mira perfectamente con principalmente e banda negativoa funciona. Un ehemplo ta e intentonan cu tabatin pa laga un comision analiza y evalua e posibilidadnan di corta ‘red tape’ pa facilita bida pa comercio. Den ultimo decadanan tabatin varios di e intentonan aki, unda a trece hopi di e aspectonan dilanti pa tuma na cuenta y resolve, cu awendia aparentemente ta suheto na estudio di e actual grupo cu ta bay lidia cu e tarea aki. E pregunta ta anto: pakico nunca a introduci ningun di e medidanan proponi? Esnan cu a traha riba e solucionnan no por contesta esey; esun cu lo por ta e mandatario(nan) envolvi cu no tabata mira nada den e sugerencianan haci. Nunca a bin sikiera un respuesta di e nivel ministerial kico tabata bon y kico menos bon, simplemente entrega di e rapport tabata significa fin di e proceso: señores adios! Pa tanto aña despues nos mira un otro grupo di alma entusiasma cuminza cana e mesun caminda cu a cana tanto aña pasa.

Awor, ta bisa anto cu nan no mester ni cuminza? No, ta importante pa cuminza di nobo y haci e trabao, pero mester tin un cos clarito promer cu cuminza: kico ta e proposito na nivel politico? Si ministro o gobiernota laga tur hende den scur tocante loke kier logra, y cu realmente por bay pa tera o pa lama, esey nan ta bay dicidi despues, cu ‘nan hendenan’? Esey no ta base pa coopera.

Otro ehemplo actual ta e situacion den enseñanza, unda e prestacion pober – como grupo, no individual – di nos studiantenan specialmente na Hulanda ta den atencion publico, atrobe. Nos ta papiando aki di un asunto cu pa mas di cuatro decada ta bolbe regularmente nos dilanti y no ta mira avance. Nos ta bisa avance y no solucion, pasobra en realidad e no tin solucion definitivo; e ta keda algo pa cual nos mester tin metodo pa sikiera tene e problema manehable. Y ni den esey nos no a avanza. Awor atrobe lo trece tur esnan cu ta ‘stakeholder’ hunto pa delibera, y aunke nos no ta optimista, ta di spera cu lo tuma cierto decision clave. E decision cu tuma, specialmente tocante e papel di idioma den enseñanza, di tur manera lo ta dificil pa ehecuta, ya cu no ta dispone di e recursonan financiero pa lo necesario, pero tuma un decision den e tradicional cacofonia di opinion ta mustra un bataya dificil.

Den e asunto aki di mes nos ta keda cu e problema grandi di awendia di e studiante cu ta caba secundario cu un conocimento bastante superficial di e idioma, sigur pa cuminza un estudio universitario na Hulandes. No ta papiando di e ‘happy few’ cu di tur manera tin loke nan mester pa ta exitoso,esta un vocabulario amplio den e idioma,pero di e grupo grandi cu no tin e preparacion debido pa esaki. Y nos no ta ni papia ainda di e problemanan social y emocional di ta de repente den un ambiente desconoci, pero ban spera cu nos por tin por lo menos un claridad kico ta bay haci pa mehora e preparacion academico di nos studiantenan.

Pero, laga nos no keda sin menciona tambe e comisionnan institui cu a logra haci un bon trabao y termina nan trabao na tempo y cu sugerencia cu a haya seguimento gubernamental. Esaki ta depende hopi di e composicion y di e forza di decision di e miembronan cu no tin miedo di papia fuerte y cla, ora resulta cu e comision no t’ey pa resolve asunto, sino pa gana tempo pa e mandatario en cuestion, sin cu realmente e idea final ta pa logra algo definitivo pa e pais. Y, ta keda na prensa tambe pa no laga e asuntonan aki sosega, pa despues di varios aña puntra nan mes ta kico a pasa…