Diaranson mainta durante un conferencia di prensa, Minister di Husticia y Asuntonan Social, Sr. Rocco Tjon, hunto cu Minister di Economia, Comunicacion y Desaroyo Sostenibel, Sr. Geoffrey Wever y director di Aruba Port Authority (APA), Sr. Mark Figaroa, a firma un “huurovereenkomst” pa renobacion di un edificio cu lo sirbi como oficina nobo pa e departamento di polis maritimo di Cuerpo Policial di Aruba.
Minister Tjon a expresa cu e firmamento di e acuerdo aki ta un momento hopi importante y cu e ta hopi contento cu por a yega na un acuerdo cu APA pa yega na un edificio nobo pa polis maritimo. El a enfatisa cu e acuerdo aki ta hopi importante, specialmente pa e coleganan di Cuerpo Policial cu pa hopi tempo caba ta percura pa eleva seguridad na pais Aruba y particularmente ora ta toca e topico di seguridad na e fronteranan di Aruba. “A pesar cu no tabatin e miho condicionnan pa loke ta boso edificio, boso semper a keda duna di boso banda y p’esey mi ta kere ta asina importante tambe pa aworaki e inversion aki tuma luga”, el a indica.
Durante e conferencia, Tjon a remarca e coopreacion di e demas coleganan Minister y tambe a subraya Aruba Hospitality and Security Foundation como un partner strategico pa por a logra e acuerdo aki. “Nos ta hopi agradecido na boso sosten pa cu esaki y no solamente pa cu e proyecto aki, pero tambe pa forma parti di e vision y e plan di maneho cu tin pa loke ta trata eleva seguridad y muy en particular den areanan turistico”, el a señala.
Tjon a splica cu e inversion aki ta uno grandi y cu tin hopi mas inversion cu lo bay tuma luga. Pero el a remarca cu e balor cu e Cuerpo Policial di polis maritimo ta agrega y e trabao cu nan ta eherce pa eleva seguridad na Aruba “ta mas grandi cu tur e miyones cu nos ta inverti den infrastructura y den material pasobra na final di dia bo por tin tur e material necesario pa eherce bo trabao, pero si no tin e dedicacion cu boso a sa di mustra tur e temponan aki, nos no lo a logra nos metanan tampoco”, el a expresa.
El a finalisa señalando cu Cuerpo Policial di polis maritimo sigur por sigui conta cu e sosten di Ministerio di Husticia y Asuntonan Social pa sigui logra e otro metanan cu nan tambe tin nan dilanti.
Minister di Turismo y Salud Publico, Sr. Dangui Oduber tambe tabata presente y a subraya tambe e logro aki y a gradici e cooperacion entre Ministerio di Turismo, Ministerio di Husticia, Ministerio di Infrastructura, Ministerio di Economia y APA cu asina a logra a yega na un bon palabracion pa e inversion pa mehora e edificio pa polis maritimo.
“Pa hopi tempo nan no tabatin un bon localidad pa labora, pa haci nan trabaonan cu ta hopi importante pa nos turismo pa nan seguridad riba nos puerto y pa nos cumplimento cu e codigonan di AISPS, kiermen e inversion aki ta hopi importante”, el a indica.
El a sigui splica cu el a drenta Gobierno, hunto cu su Ministerio a hiba combersacionnan cu Ministerio di Husticia pa yega na palabracionnan concreto pa haci un inversion cu lo resulta den e mehoracion di e facilidad pa polis maritimo tin un bon oficina caminda nan por haci nan trabao. “Gobierno a decreta aña 2022 como e aña di inversion y nos ta bay cumpli cu esaki. Esaki ta un inversión cuantioso cu lo bay tuma luga pa asina nos por tin un bunita edificio pa e polis maritimo.”, el a agrega.
Pa finalisa Minister Oduber a gradici Minister Tjon, APA y Aruba Hospitality and Security Foundation pa pone e fondonan disponibel pa por haci e inversion aki den e renobacion di e edificio pa polis maritimo, cu segun idncia dentro di seis luna lo mester ta cla.
Minister Wever tambe a dirigi algun apalabra y a felicita polis maritimo, APA y gradici nan tambe pa yuda Gobierno di Aruba cu e construccion di e edificio aki. “E ta un bunita ehempel con un entidad estatal ta coopera cu Gobierno pa trece un facilidad cu ta necesario pa infrastructura di nos pais pa nos por keda cumpli internacionalmente cu e reglanan cu ta aplicabel pa nos pais”, el a expresa.
Prome Minister, Evelyn Wever-Croes, den nomber di Gobierno di Aruba, tambe a duna palabra di gradicimento na APA y Aruba Hospitality and Security Foundation pa yuda Gobierno na e momentonan aki. El sigui y a gradici Cuerpo Policial, specialmente e departamento di polis maritimo cu pa hopi tempo tabata ubica den edificionan cu no tabata esnan di mas adecua pa eherce nan trabao. “Aworaki Gobierno ta presentando un solucion pa esaki, dentro di seis luna lo tin facilidadnan hopi mas adecua pa Cuerpo Policial por ehecuta su trabao na un forma ideal”, el a remarca.
Minister President a señala cu Aruba ta pasando den retonan grandi. Manera el a menciona Covid tabatin un impacto hopi mas duro cu locual hopi hende a spera y mientras Aruba ta purba lanta cabes di e pandemia y reconstrui pais Aruba dentro di e espacionan financiero limita, el a enfatisa cu tipo di solucionnan innovativo, practico, den cooperacion y colaboracion cu otro entidadnan ta locual cu lo yuda Aruba sigui bay dilanti.
“Nos sa cu e tempo tras di lomba, e casi dos aña cu nos ta aden tabata hopi dificil, specialmente den e caso aki tambe pa nos cuerpo policial. No solamente pa motibo di sacrificionan financiero di salario, pero tambe presion di trabao. Nos no por coregi tur cos aworaki nos ta depende ainda di sosten di likides di Hulanda y nos tin cu sigui cumpli cu condicionnan di Hulanda. Pero esey no kiermen cu nos no por traha ariba otro aspectonan pa mehora e ambiente di trabao di cada un di e empleadonan publico di pais Aruba y den e caso aki di Cuerpo Policial”, el a agrega.
Por ultimo el a gradici Minister Tjon y su ekipo cu ta sigui busca solucionnan cu apesar di tur e retonan y limitacionnan financiero, ta busca maneranan pa sigui mehora calidad di bida di empleadonan publico tambe.
“Mi ta desea boso hopi exito den e trayecto nos dilanti y mi ta spera nos por cumpli cu esaki na tempo, cumpli cu nos Cuerpo Policial na tempo y cu den seis luna berdad nos por mira un resultado hopi bunita akinan”, el a finalisa.
