(ElNacional) – Sector productivo na frontera entre Colombia y Venezuela ainda ta wardando e reactivacion comercial na e brugnan internacional entre ambos pais. Dia 22 di december 2021 tabatin expectativanan cu lo reactiva e operacionnan cu ta cera desde 2015 pa regulacionnan di regimen di Nicolas Maduro.
E intento ey a caba di kita tur animo di hopi ciudadano, asina e corant local La Nacion a indica. Tabatin dos truck cu cargamento pisa, un na Venezuela y otro na Colombia, y e chauffeurnan tabata confia cu lo laga nan pasa ariba e brug internacional Francisco de Paula Santander.
E corant local a señala cu na e banda Colombiano e funcionarionan di e Departamento di Impuesto y Aduana Nacional no a yega, door di cual e polis di e pais ey a manda e truck back. Na e banda di Venezuela un truck a yega e brug, pero nan no a ricibi contesta satisfactorio, pa cual motibo e mester a bira bay back.
“E expectativanan pa 2022 ta hopi bon”, segun Isabel Castillo, presidente di Camara di Comercio di San Antonio di Tachira a bisa na La Nacion. El a señala cu aunke ainda nan ta wardando e reactivacion comercial na e frontera, aña pasa tabatin algun avance, manera e restauracion di e pase formal pa peatonnan.
E medio a publica cu e economia formal na e municipionan Bolivar (Colombia) y Pedro Maria Ureña (Venezuela) ta pega ainda. Gran parti di e comercionan ta cera y e tikinan cu ta habri no ta reporta un cambio significante.
“Tin un cambio, pero ariba e avenida Venezuela caminda e mayoria di e ciudadanonan cu ta crusa pa bay Colombia via e brug ta pasa. Eynan tin mas bida”, Castillo a afirma.
El a puntualisa cu mas di 92% di e sector industrial ta paralisa y cu mas di 90% ta sigui sin traha pa loke ta trata e comercio na e frontera. “E cortamento di coriente ta sigui y e fayonan cu e combustibel. Locual si nos ta mira ta un aumento den e benta clandestino di gasolin”, el a manifesta.
