(EFE) – Vice-presidente y canciyer di Colombia, Marta Lucia Ramirez, dialuna ultimo a informa cu gobierno a establece un keho na oficina di Organisacion di Nacionnan Uni pa Alimentacion (FAO) na Roma, cu e cual ta rechasa e rapport cu ta ubica e pais den un alerta trempan di nacionnan den riesgo pa sufri di hamber e aña aki.
E rapport publica diabierna di siman pasa a “cay di sorpresa” pa Gobierno, asina como tambe e mapa den cual Colombia tambe ta inclui -hunto cu Haiti y Honduras den region Latino Americano- di e contexto di un alerta trempan di hamber.
“Nos ta pidi pa kita Colombia di e mapa y pa nan rectifica algun di e partinan”, Ramirez a bisa, den un conferencia di prensa y a critica e rapport “pasobra ta no ta reconoce e trabou cu Gobierno ta bin haciendo cu FAO y Programa Mundial di Alimento (PMA).
E rapport ta bin alerta cu “ta probabel cu insiguridad alimentario lo deteriora ainda mas na Colombia den e proximo lunanan debi na un combinacion di instabilidad politico, desafionan economico y e impacto continuo di e crisis migratorio regional”.
Ademas, a defende cu e rapport “mester recoge di manera mas obhetivo e realidad posibel di e pais” algo cu no ta haci, ya cu “ta un interpretacion cu ta pone nos den e wowo di e paisnan cu tin scarsedad, den caso di Colombia esey no ta existi”.
Un di e preocupacionnan cu e rapport ta destaca ta e carga adicional cu Colombia tin debi na aumento di migracion, specialmente Venezolano, e vice-presidente a continua y precisamente ta p’esey cu “FAO ta haci mal poniendo Colombia den e mapa di riesgo”.
Di su parti, representante di FAO na Colombia, Alan Bojanic a interveni pa sigura cu “e rapport tabatin otro intencion”, cu tabata “lanta atencion riba insiguridad alimentario den algun poblacion specialmente di migrantenan Venezolano”.
Den contexto aki, el a adelanta cu agencia di Nacionnan Uni “ta trahando riba con representa miho e situacion di migrantenan”, cu e rapport tabata busca “atrae mas recursonan”, aunke el a precisa cu no por adelanta un decision final cu agencia lo tuma den relacion cu e keho di Gobierno Colombiano.
