Caricom y Reino den un colaboracion mas estrecho

Reino Hulandes y e organisacion Caribense Caricom (representando 20 pais) a forma un colaboracion mas estrecho. Nan a acredita e representante Jules Bijl di Hulanda cu a indica cu nan kier expande e cooperacion.

Aruba mescos cu Corsou y St. Maarten awor no ta forma parti di Caricom como islanan autonomo, como cu nan ta considera parti di Reino. Sinembargo nan a aplica pa bira miembro y esaki ta den consideracion. E representante special ta bisa cu Hulanda mes ta sostene e peticionnan di e islanan Hulandes Caribense. Tin intercambio caba. Aruba hunto cu Corsou y St. Maarten ta participa activamente den Carpha cual ta e Caribbean Regional Public Health Agency. Y Corsou tambe ta den e Council for Human and Social Development (COHSOD).
Awor cu e representante special den Caricom, e meta ta pa Reino, y siguramente e islanan Hulandes Caribense por haya mas acceso na cierto programa y financiamento. Pero di parti di Caricom nan a indica cu nan ta hopi interesa pa siña mas di Hulanda su experiencia riba terenonan di proteccion di medio ambiente, maneho di awa, maneho di desaster, energia duradero, agricultura, procesa cuminda y infrastructura di waf y kimico.

E intencion tambe ta pa inicia programanan hunto cu lo promove negoshi, turismo, cultura y recursonan humano, asina Caricom ta indica di nan banda. Di parti di Hulanda nan ta interesa di expande colaboracion riba tereno di cambio di clima, maneha riesgonan di desaster, siguridad, desaroyo sostenibel y empleo.

Preocupacion grandi di Caricom
Un otro punto cu secretario general di Caricom Irwin LaRocque ta menciona ta e importancia di acceso na desaroyo financiero den e region Caribense. E ta enfatisa cu e region ta mustra cu nan ta sincero cu e obligacionnan financiero cu mundialmente ta imponi, entre otro pa evita actividadnan criminal manera labamento di placa y financiamento di terorismo. Sinembargo sr. LaRocque ta sinti cu e region Caribense ta sinti e efecto negativo. Como cu mas y mas banconan internacional ta stop di duna servicionan financiero den e region. Esaki tin su impacto negativo pa haci transaccionnan financiero internacional, negoshi y pa e servicio di e hendenan cu ta biba den Caribe, e secretario general ta enfatisa.