Ayera mainta un otro incidente cu servicionan di SETAR a tuma luga unda cu algun persona a vandalisa e kabelnan den area di Palm Beach loke a causa un interupcion di servicio di cable y internet pa henter mainta te cu pasa 2or y mey di atardi cu el a wordo reestableci.
Na e luga di e incidente a presenta un representante di SETAR ken a splica na diferente medionan di comunicacion cu tabata na e luga cu esaki ta un acto cu ta hopi di lamenta, diabierna ultimo 28 di januari un incidente similar a tuma luga caminda malhechornan a haci dañonan grandi riba e kabelnan di fiber ubica na area di Sero Blanco causando daño na un gran parti di e isla.
Ayera mainta, un biaha mas pero den area di Palm Beach tambe dañonan a wordo haci riba e red di fibra optica causando daño den servicio na hospital y sector di hotelnan, igualmente el a sigura cu e compania ta den alerta na e momentonan aki y tambe nan ta responde hopi lihe na unda cu nan tin sistemanan di alerta, “e mesun team di entre 10 y 15 guy ta trahando, bay cas come y bin back, ayera anochi nan a keda cla di traha 10or di anochi y awe 1or di marduga nos a haya melding atrobe, e ta un trabou cu ta tuma hopi tempo”, e persona aki a sigura.
Di mesun manera, Bon Dia Aruba a tuma contacto cu minister di Husticia y Asuntonan Social Rocco Tjon pa puntra: ¿con leu ta mira e destruccion di kabelnan di Setar como un atentado contra siguridad nacional y con por ta cu e por sosode sin ningun hende ta ripara? ¿A haya indicacion di movecion di placa of no durante e momentonan aki?
Pa cu esaki, minister Tjon a contesta cu “loke mi por bisa aworaki ta cu e caso ta uno hopi serio. E actonan aki ta condenabel, mirando e impacto cu e tin riba nos economia, den e ultimo caso Salubridad Publico, y tambe nos Turismo”
Ademas el a sigura cu tin un team multi-disciplinario, consistiendo di tur departamentonan investigativo den e cadena hudicial cu ta atende cu esaki. Manera ta conoci tur investigacion ta wordo conduci bou liderazgo di Ministerio Publico, el a finalisa.
