Pa di 2 biaha den 3 dia Aruba ta hay’e confronta cu un atake structura ariba e sistema di comunicacion ariba nos isla. E impacto ariba nos isla ta desastroso, pa motibo cu gran parti di comercio keda sin comunicacion, mescos cu Gobierno y instancianan financiero.
ATIA ta di opinion cu esaki mester wordo trata cu maximo urgencia, seriedad y atencion di autoridadnan concerni, pasobra e motibo no ta conoci, y no por automaticamente asumi cu ta pa “horta den algun lugar”.
Ta haci un yamada na tur compania cu ta di vital importancia pa nos pais, pa bini hunto y pa trata e atake aki, cu e maximo nivel di alerta. Nos mester preveni cu mentenan maligno ta sigui haci daño irreparable na Aruba pa cual e yamada aki riba.
E atake di [dialuna] a afecta un gran parti di nos hotelnan, den un tempo cu nos no mester di esaki, exactamente den fin di luna, cu mayoria negoshi ta pusha pa cera nan luna positivamente den e tempo dificil cu nos ta tratando di sali afor.
Sin pone sin kita, nos no por acepta cu algun individuo cu mente asina maligno ta tene henter un pais rehen.
Nos ta haci un apelacion na henter comercio y ciudadanonan pa ban coopera pa duna tur informacion na autoridad pa e atake aki wordo soluciona y preveni den futuro, y pa autoridad habri liñanan di comunicacion pa pone man riba esnan cu ta atacando nos pais.
Nos ta confia cu nos sistema hudicial ta trahando duro pa soluciona e asunto aki, pero ta urgi pa forma un frente nacional, mirando cu ainda nos no por ta sigur kico ta motiva e atakenan aki, y te na unda nan lo bay, pa causa maximo daño na nos comercio, ciudadanonan y nos pais.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org.
