Ayera mainta sindicatonan SIMAR, SPA, y SADA a convoca un conferencia di prensa pa asina informa comunidad cu den diferente reunionnan general cu lo tuma luga awe, nan lo dicidi con lo tuma nan oranan liber conforme cu e recorte di salario di 12.6%.
Manera ta conoci for di comienso di luna aki diferente cartanan a ser manda tanto pa gobierno como pa sindicatonan unda cu nan a pone nan posicion pa loke ta trata recorte di 12.6%, cu ademas tabatin intervencion di mediador den ultimo dos siman pa asina por yega na un acuerdo entre dos banda.
E posicion cu e sindicatonan a tuma mirando cu nan lo no haya 12.6% di salario back ta cu nan lo traha menos ora pa lo cual nan ta wordo paga, segun loke Edward Maduro presidente di Sindicato di Aduana (SADA) a informa ayera.
“Nos ta trahando desde mei 2020, 100% pero e pago a wordo ingekort na 87.4% , pues 12.6% cu tabata wordo entrega a base di solidarismo manera gobierno a pint’e na 2020, nos a indica gobierno cu e aña aki entrante 1 de februari nos lo cuminsa traha pa lo cual nos ta wordo paga, 22 ora menos pa luna”, Maduro a señala.
Asina mes, el a declara cu siman pasa tambe nan tabata den reunion cu gobierno y tambe cu mediador unda cu diabierna ultimo 28 di januari mediador a manda un carta cu e posicion di sindicatonan indicando cu entrante 1 di februari e sindicatonan, nan miembronan y trahadonan lo bay traha 22 ora menos.
Ademas di esey el a trece dilanti cu mirando cu gobierno a papia di 5% back di salario, esey no ta kita afo cu lo keda 13 ora restante di trabou pa luna “nos a bisa duidelijk, nos ta keda entrega e 12.6% temporalmente pero nos ta bay traha menos ora”, el a sigura.
Tocante e reunion cu gobierno di ayera mainta, Maduro a enfatisa cu gobierno ta mustra cu no ta dispuesto realmente pa sinta y negocia “pasobra ora bo bin na mesa di negociacion bo no por bin cu un cuchiu, bo no por bin negocia y bisa esaki tin y no tin nada otro”, el a declara.
Fin di siman Gobierno di Aruba a publica cu sindicatonan SIMAR, SPA, SEPPA y SADA ta na mesa y no a yega na un acuerdo ainda unda cu gobierno a indica cu tin dos opcion riba mesa: Traha menos ora ekivalente na 12.6% di oranan menos caminda a presenta varios proposicion, pero nan ta na espera di consehonan pa haya sa si esey por ta den un forma responsabel.
E otro opcion ta cu nan lo haya 5% di nan salario back a cambio di 13 dia di ATV pa aña, unda cu pa e opcion aki sindicatonan a señala cu nan no lo bay entrega mas pa motibo cu dianan di ATV ta debenan cu gobierno tin cu ambtenaarnan y cu “no por ta asina cu bo kier duna algo pero na mesun momento bo ta kita back for di e trahado, nos no ta di acuerdo”, Maduro a enfatisa.
Tambe, el a bisa cu ya caba e invitacion a sali pa miembronan y no miembronan di sindicato cu ta labora den Cuerpo di Aduana cu awe mainta for di 8or te 10or lo tin un reunion extraordinario na hoofdkantoor na L.G Smith Boulevard unda cu nan lo splica e posicion di sindicatonan y proposicionnan di gobierno.
Igualmente el a informa cu ayera atardi nan a manda un carta na Gobierno di Aruba informando cu e posicion di sindicatonan no a cambia.
Pa e veld di Enseñansa, Josephine Albertus presidente di Sindicato di Maestronan (SIMAR) a sigura cu e decision di traha 12.6% menos ta encera cu nan lo traha un ora menos pa dia, tambe el a indica cu “esnan laborando den veld di Enseñansa, semper y semper nan a duna di nan parti”.
Ademas di traha un ora menos, Albertus a comenta cu nan lo no haya un retroactivo back y loke nan a entrega a ser entrega cu amor pa e pais, pa asina tur por bay dilanti pero cu aworaki a yega momento pa veld di Enseñansa haya e derecho cu nan merece.
SIMAR tambe lo tin un reunion extraordinario awe 7or y mey te cu 9or y mey di mainta na sede di SIMAR pa asina ey conhuntamente cu e veld wak cu ki pasonan nan lo por cuminsa ehecuta un ora menos, el a sigura cu no ta facil manera otro sindicatonan lo implementa pa motibo cu den Enseñansa tin diferente nivel y diferente orarionan di scol.
Ta p’esey cu awe den reunion extraordinario nan lo fiha e orario cu scolnan lo cuminsa mas laat pa asina ey nan por cuminsa ehecuta di un forma responsabel teniendo na cuenta loke ta para den ley “mayornan por ta trankilo cu nan yiunan lo no ser perhudica cu e tiki ora menos cu nan ta bay haya pasobra nos ta den e margen di ley” Albertus a bisa.
Rolando Maduro ken ta fungi como vice-presidente di Sindicato di Polis di Aruba (SPA) a expresa cu durante aña 2020 te cu aworaki, polis a traha 8 ora completo sin pretexto unda cu tambe nan a mester a traha cu toque de queda y diferente accionnan cu a wordo pidi.
“Na e momentonan aki cu tin recorte di 12.6% riba nan salario, asina mes nan a duna 100% di nan parti”, el a sigura.
Igualmente cu SIMAR y SADA, Sindicato di Polis lo tene nan reunion general awe mainta 8.30 cu tur miembronan na POVA.
Pa finalisa, nan a dicidi cu nan lo tuma nan oranan liber cu of sin autorisacion di gobierno, “si nan lo tuma un decision mañan of otro mañan ora cu nos cuminsa tuma nos oranan liber, nos ta prepara pa whatever cu gobierno lo dicidi pa haci”, Edward Maduro a señala.
