“Amor pa Enseñansa” of “Respet pa Colegio” tabata loke borchinan di maestronan di Colegio Arubano tabata bisa ayera durante un accion di nan cu a tuma luga pafo di colegio ayera merdia.
For di basta tempo pasa ta conoci e situacion cu ta tumando luga na Colegio Arubano pa loke ta trata e diferencianan entre directiva SVOA, personal y maestronan, ayera merdia maestronan a dicidi di tuma accion unda cu presidente di Sindicato SIMAR Josephine Albertus a señala cu nan mes a pidi SIMAR ayera pa vocifera nan preocupacion.
For di 18 di januari e personal cu ta traha na Colegio Arubano ta trahando bou di presion, angustia y nan a manda un carta e mesun dia ey unda cu nan ta indica cu e carta ey ta keda vigente unda nan ta exigi y pidi pa directiva retira, “nos sa cu e panorama a cambia na momento cu a entrega e carta unda cu nan a duna e bestuur y di repente e rector a ser schors, e momento ey e panorama a cambia pasobra ni un momento siman pasa tabata e plan pa e docentenan buta trabou abou y esey a buta cu e panorama a cambia”, Albertus a sigura.
Tambe, el a bisa cu na e momento ey docentenan a para tras di rector pa motibo cu mayornan, maestronan y trahado di colegio a pasa den turbulencia aki. Ademas Albertus a trece dilanti cu schorsing di e rector tabata sin base.
Manera ta conoci pa basta tempo docentenan y trahadonan di colegio a manifesta caba cu nan no tin confiansa den e directiva, despues di esey tabatin mediacion cu ayudo di Obispado di Corsou cu a manda un representante unda cu despues a bin un MoU cu tabatin palabracionnan cu segun Albertus “no a ser honra y cu no a ser camina manera ta describi den e MoU” el a bisa.
Asina mes, el a menciona cu situacion di stress, preocupacion y tension no por sigui pa motibo cu ta treciendo problema na enseñansa di calidad cu alumnonan merece y comunidad mester compronde cu pa nan yiu por haya un enseñansa di calidad e factor principal ta e maestronan.
Albertus a sigura cu nan lo sigui intensiva e accionnan den dianan cu ta bin dilanti.
Di otro banda, Bon Dia Aruba a haya e carta cu Obispado di Willemstad a manda na directiva di SVOA diahuebs ultimo dia 27 di januari unda cu obispo Luis Secco a expresa cu e meta di e carta ey ta “pa trece un cambio radical den imagen cu tin aworaki di directiva di SVOA, un imagen cu mayoria di boso no ta merece” y tambe a pidi pa trece cambionan den constelacion y funcionamento di directiva.
Pa finalisa, obispo Secco a sigura pa nan “usa tur posibilidad pa trece e direccion nobo cu liderazgo di Colegio Arubano tin mester y tin derecho riba dje, nos tin confiansa den capacidad di boso pa logra e cambionan necesario”.
