Situacion di Salud Mental na Aruba ta sigui preocupa

Na mundo tin miles di hende cu tin un lucha interno, un lucha cu aunke nan tin cu bring’e pa por sobrevivi, tin algun di nan cu no ta logra caba cune. Depresion ta un topico hopi delicado cu mester bin dilanti, pa motibo cu casonan di suicidio na Aruba ta tumando lugar mas frecuentemente, pa algun tempo caba.

Ta normal cu un persona tin sentimentonan temporal di tristesa, pero si e sintoma ey ta dura mas cu dos siman, ta posibel cu ta trata di depresion. Esaki ta afecta capacidad di e persona pa sigui cu su bida diario, pa disfruta di famia, amigonan y momentonan di diversion.

E causa exacto di depresion no ta conoci, e por wordo causa pa via di combinacion di factornan como genetico, biologico, ambiental y psicologico. E probabilidadnan cu un persona por sufri di depresion ta pa motibo di: si tabatin algun familiar cu a sufri di depresion; si e persona a sufri algun trauma of stress, como abuso fisico of sexual; ora un ser keri a muri; of tambe por ta pa via di problemanan financiero; ora haya problema medico of pa consumo di alcohol of droga.

Efectonan di depresion den salud ta bay hopi mas leu cu estado di animo, ta un malesa medico grave cu hopi sintoma, incluyendo fisico unda e persona tin:

Sentimento di tristesa, ansiedad of un bashi interno constante;

Sinti desesperacion of pesimismo;

Tin sentimento di culpa, falta di autoestima y impotencia;

Perde interes of placer pa haci actividadnan diario of hobby;

Ta sinti sin energia;

Tin dificultad di concentracion, corda di detayenan of tuma decisionnan;

Tin problemanan pa drumi, incluyendo lanta hopi trempan mainta of drumi hopi;

Ta cambia habito di cuminda y subi di peso;

Ta sinti dolornan di cabes, problemanan digestivo sin un causa fisico y cu no ta alivia cu tratamento;

Ta haya pensamento di mata su mes of purba di kita su bida.

Tambe ta existi personanan cu despues cu a ser diagnostica pa algun malesa cronico ta sufri di depresion. E sintomanan por disminui na medida cu e persona ta haya y ta adapta na tratamento pa e malesa ey. Ta posibel cu algun medicina cu ta usa pa trata e otro malesa tambe ta produci depresion.

Tabata dia 7 di april ultimo ora Fundacion Respaldo y su director, Dr. Hendricus van Gaalen a bati alarma tocante e situacion cu sector di Salud Mental tabata bibando na e momento ey, y cu te ainda ta sigui keda preocupa henter comunidad, unda cu hobennan y hasta hende adulto ta dicidi di no continua cu nan bida y ta comete suicidio.

El a informa cu Respaldo a cuminsa casi cuatro aña pasa cu 1.400 hende pa aña, nan a subi casi na 3.000 pero prome cu covid-19 caba nan tabatin entre 8.000 pa 12.000 hende pa warda pa tratamento special, na e momentonan ey riba esey tambe nan a haya tur e malesa door di pandemia.

Van Gaalen a splica cu pa trata un malesa cu tratamento special ta costa aproximadamente 5.000 florin

y cu segun el a menciona e ta parce hopi pero no, na Hulanda e ta costa desde 8.000 te cu 16.000 florin pa trata un malesa, “loke ta nifica cu nos ta hopi efectivo, nos no ta gasta hopi placa pero nos no tin manera, Aruba ta den un peliger pa haya un di dos tsunami di malesanan mental y nos no sa con nos tin cu purba pa soluciona e problema aki”, el a afirma.

Asina mes, na e momento ey el a confirma cu no tin un solucion instantaneo pa e situacion aki y tambe mirando cu eleccionnan tabata cerca tabata importante pa tur e partido politico compronde e salud mental y lo cual tin cu haci pa esaki mester ta na prome luga di e añanan cu ta bin, “si nos no haci esey, aki 10 aña nos ta den problemanan ainda”, Van Gaalen a manifesta.

El a bisa cu nan ta pensa hopi riba e lista di pashentnan cu tin cu warda, kico pa haci di diferente manera pero e ta kere cu nan mester papia prome cu minister di Salud Dangui Oduber riba esaki, pa asina wak con nan por resolve y kico gobierno por haci pa motibo cu ni Respaldo, ni departamento di Asunto Social por carga esaki riba nan mes, “e ta un responsabilidad di tur”, el a enfatisa.

Na Aruba ta conoci cu tin pashentnan cu ta pidi afspraak cu specialistanan como psicologo of psikiatra y nan tin cu warda mas cu tres of cuatro luna pa por ricibi un opinion medico specialisa, un problema cu ta persisti na unda cu escasez di personal tambe ta bin dilanti y cu mester pone esaki como prioridad.

“Nos ta bati alarma pa e proximo dies aña y si nos no ta haya manera pa drecha esaki Aruba ta haya un problema hopi hopi grandi”, Van Gaalen a afirma na luna di april di aña pasa.

Tambe, el a sigura cu hendenan hoben esun cu ta bao 18 ta den un peliger mayor, hende cu ta hopi grandi cu algun di nan ta sufri di soledad na e momentonan aki por ehemplo y esunnan cu ya caba tabata debil, ta e di tres grupo grandi cu ta bay sufri mas cu tur, pero nan no tin manera pa haya ayudo.

Pa finalisa, el a señala cu nan como Respaldo a purba di haci cos mas efectivo, nan a drecha algun cos pa wak con nan por traha miho, “nos a wak tur cos, pero nos no por mas y nos no ta haya mas tampoco”.

Aworaki cu eleccionnan a pasa y Gabinete Wever-Croes II tin mas di tres luna den nan funcion, Salud Mental di comunidad ta sigui keda un topico hopi importante y cu mester di atencion di manera urgente.