For di algun tempo ta bin dilanti preguntanan tanto di parlamentarionan como di comunidad pa loke ta trata maneho di Aruba Health App. Ya bin tumando lugar cierto incidentenan cu ta lanta pregunta tocante e responsabilidad pa informacion y pa datonan medico.

For di un fuente fidedigno Bon Dia Aruba a haya prueba di dos persona (un pareha) cu a haya caba nan dos prome vacuna, e prome tin tur su datonan completo den e sistema pero di e otro persona, nan a haya sa cu su datonan no ta registra na Departamento di Salud Publico (DVG). Esaki ta duna problema, por ehemplo ora un persona asina mester bay biaha, y tambe ta surgi e pregunta con dato personal ta yega na instancianan internacional, si nan no ta registra den e Health App.

Relaciona cu esaki Bon Dia Aruba a tuma contacto cu PR di DVG, Jurette Croes, pa puntra con DVG ta garantiza cu informacion clave di tur hende ta presente? Ademas, con ta garantiza cu e personanan no ta haya problema si nan informacion no ta disponibel pa por ehemplo, un persona haya e EU certificate?

Croes a bisa cu “Aruba Health App no ta wordo administra pa DVG, dus mi no por contesta bo pregunta, e ta wordo administra for di Bureau di Turismo y Deporte y pa esey tin cu puntra minister di Salud su PR”. Ta importante pa trece dilanti cu pa varios biaha Bon Dia Aruba ta purba di haya contestanan pa cierto pregunta cu redactor tin pero no ta haya contesta ni di minister Oduber ni di su PR.

Di otro banda, den prome dianan di e luna aki, specificamente dia 5 di januari, parlamentario y lider di fraccion di partido MAS, Marisol Lopez-Tromp, a manda diferente pregunta dirigi na minister di Salud y Turismo Dangui Oduber, tocante e situacion aki cu ta regarda e maneho y ken ta esunnan responsabel pa Aruba Health App. E preguntanan di Lopez-Tromp tabata lo siguiente:

Dicon e (asunto) no ta den man y bao guia di DVG?

Dicon gobierno y minister di Salud Publico a opta pa pone Aruba Health App y datonan di salud di pueblo pa cu resultadonan di test di Covid-19 y e datonan di vacunacion den man di un particulier y no di DVG?

Ki confiansa tin intencionalmente awor den Aruba Health App su maneho cu datonan di vacunacion y QR Code ora cu residentenan di Aruba ta biaha na otro pais?

Minister di Salud Publico por garantisa pueblo cu privacidad di su informacion di su salud ta salvaguardia cu Aruba Health App?

Minister di Salud Publico Dangui Oduber a saca un publicacion riba su pagina di red social Facebook, pa duna un contesta na parlamentario Lopez-Tromp dia 12 di januari ultimo unda a publica lo siguiente:

“Minister Dangui Oduber a mustra e miembronan di Parlamento riba e hecho cu ta Directie Volksgezondheid Aruba (DVG Land Aruba) ta doño di e Aruba Health App y tin full control di esaki. E Aruba Health App a keda desaroya hunto cu Setar NV. A splica riba e hecho tambe cu no tabata tin tempo pa haci un destaho publico como cu Aruba ta pasando den un crisis y un destaho publico lo a tuma mucho tempo y ta p’esey a opta pa uza nos compania estatal di Setar NV pa yuda desaroya e App.

Cu esaki, por a mustra cu no ta duna claridad na comunidad pa loke ta trata maneho di Aruba Health y tanto minister Oduber como DVG no ta riba e mesun linea. Di un banda minister ta señala cu Aruba Health App ta den man di DVG y nan tin full control riba esaki, pero PR di e departamento aki ta contradeci minister Oduber su ponencia ora el a contesta cu “Aruba Health App no ta wordo administra pa DVG sino cu e ta administra for di Bureau di Turismo y deporte”, loke ta significa cu e ta cay bao minister di Salud Publico Dangui Oduber.

Nota di Redaccion:

Den tur esaki nos a keda cu un splicacion incompleto, cu no ta indica ta kico e ciudadano mester haci cu ta ripara cu su datonan no ta disponible riba e site referi, y por lo tanto no por avanza, ni pa su uso local, ni pa loke ta biahe den exterior. Pregunta simple: unda ta acudi pa registra dato corectamente ora un ciudadano haya sa cu su registracion NO ta completo?