Minister Ursell Arends ta ehecutando un ofensiva di media, pero den e intento aki no ta papia e berdad. Asina Parlamentario di AVP dr. Ryçond do Nascimento ta opina. Do Nascimento a sigui henter e discusion riba e rapport di CARMABI di cerca y hasta tabata presente ora cu DOW a habri e sluis di RWZI cu a lanta hopi pregunta.

Segun Ryçond do Nascimento, e Minister di Integridad, Naturalesa, Transporte y Cuido di Hende grandi ta continuamente bao presion desde cu e rapport di CARMABI a keda publica riba pagina di e propio fundacion cientifico. “CARMABI mes a bisa riba su Facebook page cu hopi hende a puntra pa e rapport y ya cu e version ‘draft’ a keda publica a haya un bon idea pa comparti e version final,” Do Nascimento a señala. “Hasta cu CARMABI a bisa di ta habri pa pregunta.”

Den concepto di e Parlamentario, e publicacion aki, Minister Arends a keda exponi pa e falta di transparencia. Particularmente riba e peliger di manda awa mal trata pa lama. E situacion aki a escala ora cu a saca prueba cu awa sushi di Bubaliplas ta bay den lama durante ora di anochi, y pa colmo DOW ta bisa cu ta un procedura normal. “A base di e ‘Bubali-gate’ Minister Arends a publica articulonan pa publico di habla Hulandes y Papiamento unda ta bisa cu ta individuonan di mal intencion cu pa motibonan politico ta causa mayoria di e candelanan riba Parkietenbos,” Ryçond do Nascimento a bisa. “Y su argumento ta cu investigacion ta indica esey. Pero, claro no ta bisa ken a haci e investigacion aki. Claro cu e Minister lo no comparti e investigacion aki, pasobra transparencia ta peligroso. Tampoco e Minister por bisa ken ta e individuonan. Ta autoridad lo mester saca afo ken nan ta, e Minister a bisa.” Pa do Nascimento, e comentario aki ta straño pasobra e Minister por bisa cu ta trata di hende cu mal intencion cu tin motibo politico, pero no por bisa ken nan ta.”

Conferencia di prensa

Otro punto ta cu e confusion cu Minister Arends a crea den su ofensiva di media, segun e Parlamentario di AVP. “Den su conferencia di prensa el a bisa cu e keho tabata na landsrecherche, pero den otro programa radial e keho lo a keda entrega na Ministerio Publico.”

Locual dr. do Nascimento ta haya straño ta cu Sr. Arends a cuminza su campaña di media contra e cendemento di candela na dump, pa motibo di e bashamento di awa di riool mal trata den lama. “Sr. Arends, na momento di a bira Minister na September, tabata sa caba di tur e candelanan riba dump, pero te cu awor no a haya necesario pa un campaña di media contra esaki. Di con e Minister por ehempel no a expresa fuertemente ora di e candela grandi recien causa pa tairanan na candela? Cu e tabata sa di e candela ta un hecho. Ora cu a deposita tur e tairanan banda di e candelanan, diverso activista y habitante a manda advertencia pa e peliger cu tur e tairanan lo por pega na candela. Como Minister encarga cu soluciona e problematica di e landfill, e lo tabata na su luga pa por lo menos yama Serlimar y exigi pa tuma medida pa evita e candela. Pero e Minister no a haci esey.” De Nascimento ta puntra si Minister Arends tabatin miedo di a keda acusa di metemento politico den Serlimar.

Falta di credibilidad

Pero locual ta cla pa e Parlamentario di AVP ta cu e preocupacionnan di Minister Arends pa e candelanan no tin credibilidad, pasobra e no ta splica cu riba e landfill mester papia di candelanan continuo. Tin candelanan riba superficie pero tambe hopi mas abao. “Ta candelanan cu no por paga. Cualkier movecion riba e landfill berdad por pone cu un candela ta lanta spontaneamente, pasobra esey ta trece oxigeno na un candela chikito cu e ora por crece. Banda di esey, e Minister kier laga pueblo kere cu e gas di landfill, esta e methaan y otro, no ta existi of no ta forma ningun peliger pa trahadonan di Serlimar y habitantenan di Parkietenbos y bisindario. Ta mustra mescos cu ta un cas den bario mester explota of trahadonan di Serlimar haya kemadura pa Ursell Arends kere cu e gas no solamente ta peligroso pa medio ambiente pero tambe pa salud publico.” Ryçond do Nascimento a mustra cu tin un cantidad di estudio cu ta ilustra net contrario cu locual e Minister a bisa.

“Con cu bay bin, e motibonan di e Minister cu e campaña di media entretanto ta hopi cla. Esta tira santo den wowo di pueblo pa e scandal di ‘Bubali-gate’ y demonisa activistanan di medio y periodistanan preocupa door di pusha e candelanan riba dump na Parkietenbos den nan sapato,” e Parlamentario di AVP a termina, agregando e pregunta si e actitud aki ta uno integro.

Reunion Parlamento

Entretanto, Diahuebs awor, Parlamento lo tin un encuentro publico riba e tema. Tabata Fraccion di MAS y Accion21 cu a pidi un reunion publico pa discuti e rapport di CARMABI, y a pidi pa tres Minister ta presente, cu ta Minister di Infrastructura mr. Evelyn Wever Croes, Minister di Salubridad Publico, Sr. Dangui Oduber y Minister encarga cu Naturalesa Sr. Ursell Arends.

Pero Presidente di Parlamento a scoge pa un encuentro publico unda unicamente mr. Evelyn Wever Croes lo duna splicacion di e rapport.

Tin diferencia grandi entre un encuentro publico y reunion publico. Un encuentro publico no ta permiti Parlamentarionan entrega mocionnan y unicamente por haci pregunta. Esnan cu a pidi e reunion tabata kier uno unda nan por a entrega mocionnan.

Den e invitacion ta mustra Minister di Asuntonan General, Integridad, Administracion Publico, Innovacion y Energia mr. Wever Croes lo ta presente kende lo papia di e instalacion di e RioolWater Zuiverings Installatie na Bubali y e peliger cu esaki por forma pa turismo, economia y naturalesa manera cu CARMABI a splica den su rapport “Coral Reefs Baseline Study for Aruba 2019.”