Venezuela a ser usa como punto di reunion pa miembro di cartel di Sinaloa, hunto cu otro narcotraficante local. Esaki durante e reinado di Joaquin “El Chapo” Guzmán, asina un documento cu Fiscalia di Merca a presenta dilanti di Corte di Districto Este di New York dia 20 di januari ta indica. Venezuela, Ecuador y Colombia tabata paisnan principal cu El Chapo a usa pa expande su cartel na Sudamerica, y asina el a logra ocupa diferente espacio cu tabata pertenece na cartelnan Colombiano, segun un texto di 56 pagina a indica, cu ta detaya bida y obra criminal di Guzman durante 25 aña den negoshi di narcotrafico.
Autoridad di Merca a bisa cu “modus operandi”di Guzman tabata pa penetra cu miembro di su organisacion criminal den e pais aki, pa despues logra un acuerdo directo cu persona perteneciente na mafia local, y asina controla tur parti di e cadena di suministro. Algun transportado di droga cu a participa na importacion di carga di cocaina na Merca ta dispuesto pa duna testimonio bao figura di “Testigo cooperante” den huicio contra Guzman. Den e proceso aki autoridad ta spera cu haya sa tur detaye tocante metodo cu a usa pa yega Merca cu carga di cocaina, marihuana y metamfetamina.
E informante tambe ta dispuesto pa splica e uso di avion carga di cocaina cu tabata biaha desde pista clandestino na Venezuela te Honduras, El Salvador, Costa Rica y Panama. Asina tambe informacion tocante traslado te Mexico y despues pa Merca den auto modifica of tunel clandestino.
