Pa algun dia caba e situacion na Colegio Arubano ta continua sin cu por yega na un solucion pa bienestar di e studiantenan. Mirando e situacion, ayera mainta e comisionnan di mayor di Colegio Arubano, OCCA y ACA, hunto cu un grupo di mayor y studiante a uni na e protesta dilanti di scol pa demostra nan mal contento.

Den un entrevista pa Bon Dia Aruba Sra. Marja Hoveling, un representante di e mayornan y un di e personanan tras di e protesta di ayera mainta a splica cu algun dia despues di tur locual ta pasando na Colegio Arubano e mayornan tambe a involucra nan mes pa wak kico nan por haci pa yuda cu e situacion.

El a indica cu algun miembronan di OCCA, ACA y mayornan independiente a redacta un carta oficial diahuebs pa haci entrega di esaki na presidente di SVOA, Sr. Ernesto Rosenstand. Hoveling ta conta cu nan a manda un invitacion pa Sr. Rosenstand y tur e otro miembronan di e directiva pa por haci entrega di e carta oficial aki, pero segun el a conta, exactamente un minuut despues cu nan a manda e invitacion nan a ricibi un respuesta for di Sr. Rosenstand indicando cu nan no tabata kier ricibi e carta aki y a rechasa e invitacion di parti di e mayornan.

“E tabata en berdad dentro di un minuut despues cu nos a manda e invitacion y Sr. Rosenstand a indica cu e tabata papiando den nomber di full e directiva. Ami a puntr’e un biaha mas, contestando e back, si tin un otro ora y otro luga cu nos por reuni pa entrega e carta pasobra e ta un peticion oficial y bo mester entrega esaki na e otro partido. Nos a haya e respuesta for di dje bisando cu e no kier papia cu “terceronan”, un partido cu no ta inclui den e problema na e momentonan aki y esey tabata su respuesta final”, Hoveling a splica.

Pa e motibo aki e mayornan a dicidi di presenta na scol diabierna mainta pasobra ya tabatin un protesta planea. Tur e maestronan a presenta pa 7:30 di mainta na e parkinglot dilanti di Colegio Arubano y hopi studiante tambe a presenta pasobra, manera Hoveling ta indica, “e ta nan storia”.

“E no ta e storia di ningun otro hende pasobra nan tin e derecho na educacion, dus nan tabata envolvi den e protesta tambe”, el a agrega.

Diabierna mainta durante e protesta e representantenan di OCCA, ACA y mayornan independiente a drenta scol mes pa purba entrega e carta na e manager di recurso humano cu tambe ta forma parti di e directiva di SVOA, pero e no tabata t’ey y ningun di e damanan di e oficina tabata t’ey.

Den bista cu e no tabata posibel pa entrega e carta na ningun otro miembro di e directiva, e mayornan a dicidi di laga e carta, nan a pasa esaki bao di e porta cu tabata cera y nan a entrega e carta na e abogado di Sr. Rosenstand. E abogado a tuma e carta y a firma cu a ricibiele y e carta oficial ta na e oficina di e abogado na e momentonan aki.

“E cos straño ta cu SVOA ta pensa cu e mayornan y e studiantenan no ta un parti importante den e problema aki. Pero e ta un circulo, bo tin e mayornan, bo tin e studiantenan y bo tin e maestronan y nos ta trahando hunto. E directiva tin un idea straño cu e studiantenan y e mayornan no mester ta envolvi den esaki y esey tambe a punto di e comisionnan di mayor na e momentonan aki”, Sra. Hoveling a expresa.

El a enfatisa cu e situacion aki ta afecta e studiantenan completamente, pasobra nan tin dos aña caba lidiando cu e problemanan cu e pandemia a trece cune y aworaki mester agrega otro problema cu tin un efecto grandi riba nan educacion. “Nan ta desaroya problemanan psicologico, problemanan di concentracion, e falta di lesnan pa motibo di lockdown y aworaki un biaha mas y memey di examen week. E situacion aki no ta sano pa e studiantenan y esey ta e motibo pakico e mayornan a bin na accion”, el a bisa.

Sra. Hoveling a splica cu na prome instante nan a ricibi e contesta di SVOA indicando cu e mayor- y studiantenan ta wordo considera como partido tercero, no relevante pa forma parti di e discusion. Pero SVOA a manda un carta, sin papia cu e rector y sin papia cu e maestronan, nan a manda un carta diahuebs pa e mayornan informando cu otro siman ariba diaranson, diahuebs y diabierna e examennan cu e studiantenan a perde e siman aki lo wordo duna.

Hoveling a remarca cu mientras e problema existi, mientras cu e directiva di SVOA t’ey ainda y rector Tim Croes ta geschorsd ainda pa e directiva di SVOA, e maestronan no ta bay traha. Nan ta para firme cu mientras cu e problema no wordo soluciona, mientras e rector no bin traha back y cu no tin un investigacion den e directiva di SVOA, nan no lo acepta e carta di SVOA. Solamente si e maestronan y rector bay di acuerdo cu e fechanan pa e studiantenan traha nan examennan di nobo of ora cu nan mes pone fecha nobo, e ora ey e mayor- y studiantenan lo bay di acuerdo.

Mientras tanto e mayornan lo warda ariba un carta di parti di e maestronan y e rector di Colegio Arubano.

Hoveling a indica tambe cu despues di e protesta di ayera mainta el a ricibi un carta di parti di Sr. Rosenstand unda cu e ta ofrece pa sinta papia cu e mayornan despues cu e problema wordo soluciona. El a indica cu nan contesta tabata cu nan kier ta parti di e combersacion y cu nan no kier papia cune despues cu e problema wordo resolvi. “Nos kier papia cune aworaki. E problema ta afecta nos yiunan”, el a bisa.

A pesar di tur e problemanan y e situacion, algo bon cu a sali di tur esey ta cu e maestro-, studiante- y mayornan ta uni y ta para hunto aworaki. El a subraya cu e tin speransa cu por yega na un solucion pronto pasobra e hobennan ta esunnan cu ta sufri mas.

“Despues di dos aña di enfrenta tur e problemanan cu e pandemia a trece cune y ta conoci rond mundo cu e hobennan entre 15 y 25 aña di edad ta esunnan cu tin mas problema na e momentonan aki. Nan no por handle e situacion aki y no ta bon ora cu nan ta wak adultonan ta bully, e no ta un bon ehempel”, el a expresa.

Por ultimo Sra. Hoveling a indica cu nan mester un directiva na Colegio Arubano cu nan enfoke ta e muchanan. “Nos mester un directiva cu hendenan cu por bisa cu nan kier forma parti di e directiva pasobra nan kier haci algo bon pa e muchanan y na e momentonan aki no tin niun hende den e directiva cu tin e motivacion ey, si no nan no lo haci esaki”, el a finalisa.