(CuraçaoChronicle) – Prome minister di Corsou, Gilmar Pisas, y Secretario di Estado Hulandes pa Relacionnan di Reino y Digitalisacion, Alexandra van Huffelen a reuni virtualmente diahuebs mainta. Desde cu Van Huffelen a asumi su cargo, e tabatin contacto solamente via telefon cu Pisas.
Ademas di prome minister, vice-prome minister Ruthmila Larmonie; minister di Finanzas Javier Silvania; y minister plenipotenciario Carlson Manuel tabata presente durante e reunion virtual. Durante e reunion, a introduci e teamnan na otro y ‘a duna prioridad na un forma transparente di comunicacion’.
Entre otro, a discuti e desaroyonan mas recien relaciona na pandemia di Covid-19, e Conseho di Minister di Reino, y e ideanan y deseonan regardando e landspakketnan. E puntonan aki ta bay keda discuti mas profundamente e luna aki pa yega na un acuerdo prome cu e proximo Conseho di Minister di Reino programa pa dia 4 di februari proximo.
