(LaPatilla) – E debe financiero consolida di e empresa estatal petrolero Venezolano PDVSA a aumenta cu 1.2%, alrededor di 400 miyon di dollar, y a yaga 34.900 miyon di dollar aña pasa, segun un comunicado publica diaranson den medionan di e Estado.
Alrededor di tres kwart di e debe pendiente di PDVSA na final di 2021 tabata relaciona cu e prestamonan tuma pa e compania, principalmente bonusnan, segun e comunicado publica den e corant estatal Correo del Orinoco a indica.
E resto di e debe a bin di bonusnan y di prestamonan tuma pa subsidiario- y empresanan conhunto. PDVSA a suspende pagonan na esunnan cu ta ricibi bonus y hopi otro cu merece despues cu el a bira obheto di sancionnan financiero y comercial di Merca.
E huntanan controla pa e Presidencia Encarga di Juan Guaido cu ta supervisa Citgo Petroleum, e filial stranhero principal di PDVSA, a contrata aña pasa e compania JP Morgan Chase & Co pa explora negociacionnan di pago.
Na 2021, Venezuela a logra stop e caida liber di su produccion petrolero, cu a cuminsa ora cu e sancionnan a wordo introduci na 2019, blokiando PDVSA di su mercado principal di exportacion, Merca.
Venezuela a informa e siman aki na e Organisacion di Paisnan Exportador di Petroleo (OPEP) cu e produccion a aumenta na 871 mil bari pa dia na december, elevando e promedio di 2021 na 636 mil bari pa dia, 12% ariba di e produccion di 2020.
E empresanan chikito di servicio a contribui tambe na e recuperacion di e produccion di petroleo di Venezuela, mescos cu e importacionnan di suministronan clave di Iran.
