Dialuna Minister di Turismo y Salud Publico Sr. Dangui Oduber den conferencia di prensa a duna un bista riba e cifranan di turismo di aña 2021 den comparacion cu cifranan di aña 2019.
Minister Oduber a comparti cifranan di e turismo crusero tambe di aña 2021 y 2019. Apesar cu den aña 2021 nos a conoce obstaculo di e variante di Delta tog Aruba su turismo a conoce un recuperacion substantial.
Den e totalidad Aruba su turismo a recupera 72% den comparacion cu aña 2019 haciendo aña 2021 un bon aña di recuperacion, den e grafica ta ilustra con esaki tabata durante henter e aña.
Un di e indicadornan di mas importante ta e tourism receipt, esaki ta e cantidad di placa cu e turistanan ta laga atras den Aruba su economia. E tourism receipt di aña 2021 a surpasa esun di aña 2019. Kiermen menos turista a gasta mas placa, asina e mandatario a menciona.
Turismo Crusero
Turismo Crusero ta esun cu a keda mas afecta door di e pandemia, ta apenas den luna di juni 2021 Aruba a ricibi su prome crusero. E industria aki a cuminsa hopi slow y poko poko a cuminsa crese gradualmente.
Minister a duna di conoce cu den e luna di december aña 2021 Aruba a ricibi un total di 48,209 bishitante crusero compara cu 126,452 den december di aña 2019. Esaki ta un caida di 61.9%, e cantidad di calls nan tabata 35 calls den december 2021 compara cu e 50 calls den december 2019.
Den aña 2021 Aruba a ricibi un total di 136,211 bishitante crusero compara cu 832,399 bishitante crusero den aña 2019, esaki ta representa un caida di 85%. Den aña 2021 Aruba a ricibi un total di 96 calls compara cu e 324 calls cu Aruba a ricibi den aña 2019, un diferencia di 228 calls menos.
Ultimo Desaroyo Turistico
Por ultimo Minister Oduber a comparti e ultimo desaroyonan den turismo. E mandatario a menciona cu ultimamente Aruba su turismo a sufri un caida substancial door di e variante di Omicron. Den e prome 3 siman di aña 2022 Aruba a registra un caida di entre 25% pa 30%. Por a tuma nota cu aerolineanan manera Frontier Airlines y Air Canada a suspende nan vuelonan pa Aruba, tambe a mira hopi cancelacion den e grupo nan di negoshi.
Minister Dangui Oduber a menciona cu e proyeccionnan pa aña 2022 tabata mustra cu Aruba lo bay recupera 100% di su turismo den comparacion cu aña 2019. Lamentablemente door di e variante di Omicron esaki a keda ahusta na 85% di recuperacion. Segun e mandatario Omicron a cambia e perspectiva pero ainda tin tempo pa recupera di e retraso, por logra esaki tumando e pasonan correcto y calcula e risiconan. Nos tur ta depende di turismo.
