Como parti di su contribución nan na proyectonan importante relaciona na bienestar general di nos isla pero sigur na bienestar di nos turismo, Aruba Tourism Authority (A.T.A.) for di aña 2016 a uni na e proyecto di sterilisacion di mascota estableci y coordina pa Fundacion Stimami Sterilisami. E fundacion, cu a wordo estableci y ta encabesa pa Bucuti & Tara Beach Resorts, a dicidi di para e programa na juni di 2021 pa falta di suficiente fondo, cu ta consequentemente mara na impacto di e pandemia. 

 

E recuperacion di turismo cu Aruba ta conociendo ta haci posibel pa e programa aki keda re-inicia na 2022. A.T.A. a dicidi di tuma e oportunidad pa yuda mitiga e problema di sobre poblacion di cacho y pushi na Aruba pa medio di e fundacion pa yuda alivia e problema cu ta afecta tanto e residentenan como bishitantenan.

 

A.T.A. a y ta sigui ricibi feedback negativo di bishitantenan encuanto di e cantidad di cacho y pushi cu ta riba caya sin cuido apto. Bishitantenan ta remarca un desapunto den e falta di cuminda, awa fresco y cuido medico en general di cachonan cu ta cana los riba caya y na e playanan. Tambe nan ta bisa di ta sinti nan mes incomodo cu e risico cu por tin cachonan brabo den e gruponan di cacho na diferente luga cu nan ta bishita.

 

Pa medio di Stimami Sterilisami ta subsidia e operacion di cacho y pushinan. E doño di e mascota ta haya un descuento na momento cu e ta inscribi su mascota den e programa. E ta un reduccion considerabel di e prijs di e operacion, esaki sigur ta encurasha e doño pa laga sterilisa su mascota. E fundacion tambe ta subsidia e sterilisacion di mascotanan cu ta cay bao cuido di e diferente organisacionnan cu ta tuma mascotanan cu ta sin cas.

 

E meta principal di Stimami Sterilisami ta pa logra baha e sobre populacion di cacho y pushinan y mantene e cantidad na un nivel sostenibel. Den su prome cinco añanan e fundacion a logra contribui na e sterilisacion di 26,397 pushi y cacho y asina para e ciclo di reproduccion di e mascotanan aki.

 

E experiencia di e fundacion den su e prome cinco pa seis añanan ta mustra cu pa logra e meta di efectivamente disminui y controla e cantidad di mascota, mester logra un total di 5,000 pa 6,000 sterilisacion pa aña. E costo di e accion aki ta entre 500,000 y 600,000 florin. Como un sponsor clave, Aruba Tourism Authority ta uni cu Bucuti& Tara Beach Resorts, kende ta inisiador & cargado di e programa aki. Pa mas informacion por bay na e website y asina registra via www.stimamisterilisami.com