Hospital, IMSAN y cuido exterior gastonan grandi; ‘Eigen bijdrage’ talvez no ta suficiente

A traves di AZV a bira conoci e medidanan cu lo tuma e aña aki pa trata di disminui e gastonan di cuido medico, manera esakinan ta acumula cerca e organo ehecutivo AZV. Ta trata di e contribucion cu ta pidi di e ciudadano na momento cu e ta den contacto cu e sistema y ta haya servicio/producto. Asina e contribucion ta pa bishita na specialista, bishita na Hospital (Huisartsenpost y Spoedeisende Hulp).

Tambe na momento di haya medicamento na botica ta paga un contribucion pa cada medicamento separa, ademas cu cierto remedi no ta obtenible mas via recept pero ta disponible ‘over the counter’ contra pago. Ademas tin limitacion di e remedinan cu ta cubri y tin otro cu ta obtenible solamente bao cierto criterio, segun disposicion di e medico cu ta trata. Tambe tin contribucion pa uso di laboratorio, pa cada test cu ta pidi.

Den e tabel acompañante, procedente di relato anual di AZV pa 2020, por haya un impresion na kico ta gasta e casi 450 miyon florin cu e aña ey a bay na gasto medico. Por observa cu e gastonan grandi ta cuido na Hospital, cuido den exterior y cuido na ImSan. Hunto e tres categorianan di hospitalizacion ta bon pa Afl. 252,2 miyon di e total di Afl. 448,9 miyon (56,1%). Esakinan no ta sinti tanto efecto di e medidanan, ya cu e costonan halto ta relaciona cu e cuido di pacient unavez nan drenta e facilidad. Hospital por ehemplo ta cobra pa Huisartsenpost, Spoedeisende Hulp y Laboratorio, pero esakinan ta un parti chikito di e gastonan total di operacion.

Medicamento ta entre e gastonan halto (Afl. 58,5 miyon) y ta unda e contribucion lo bay haci diferencia, aunke ta dificil pa calcula cuanto esaki lo ta. Tambe por mira cu gasto di docter di cas y specialista na 2020 ya caba tabata bahando en comparacion cu e gastonan na 2019. E austerizacion a traves di e contribucion propio cu no ta na Hospital, ta riba e presupuesto di medicamento y specialista, cu hunto ta un suma di Afl. 73,2 miyon, cu ta 16,3% di e total na gasto. Ta parce logico cu esaki lo no ta suficiente pa realiza e austerizacion considerable cu ta necesario pa mantene e gastonan medico bao control.

Un detaye remarcable cu no tabata asina conoci ta cu gasto di cuido di salud mental ta costa mes hopi cu henter e gasto di specialista pa henter e resto di poblacion. No ta indica esaki como critica, pero pa mustra cu ta importante traha riba e medidanan preventivo pa minimaliza e necesidad di cuido mental.

En total e gastonan medico, hunto cu e gastonan di organisacion di AZV, ta yega na Afl. 467,5 miyon na 2020. Esaki tabata alrededor di 10,4% di GDP nominal, segun e cifra preliminar di Banco Central pa 2020. Mester tuma na cuenta si cu pa 2021 ya caba e GDP tabata bolbiendo den direccion di e nivel di 2019, loke ta duna un imagen mas positivo.