Despues cu diamars ultimo a keda conoci e incidente entre rector di Colegio Arubano y presidente di SMOA, ayera mainta algun docentenan di colegio a dicidi di pone nan trabou plat pa asina duna nan apoyo y sosten na e rector loke por trece como consecuencia mas accion di parti di nan den dianan aki.

Manera Bon Dia Aruba a indica den su edicion di diamars, presidente di SVOA, Ernesto Rosenstand kier a reuni cu rector di Colegio Arubano Tim Croes pero e ultimo no tabata kier na e momento ey, e situacion a scala di manera cu Rosenstand a cera e porta na yabi di e kantoor pa Croes no por sali pa loke a trata di kita su libertad y despues di e incidente aki el a keda suspendi di su funcion.

Reportero di Bon Dia Aruba ayera mainta a yega na Colegio Arubano na unda docentenan a pone nan trabou plat pa duna apoyo na Croes unda cu a logra di papia cu Josephine Albertus ken ta fungi como presidente di Sindicato di Maestronan di Aruba, el a bisa cu for di basta tempo e situacion ta tenso na Colegio Arubano entre e directiva y trahadonan.

El a recorda cu aña pasa na luna di juli nan tambe a para pafo unda cu por medio di un carta a pidi pa e directiva bay, na e momento ey Simar a sinta como intermediario y a presenta acuerdonan como un MoU y a bin cu diferente palabracionnan unda cu el a trece dilanti cu den un carta cu nan a publica diamars ultimo el a wak cu e palabracionnan cu a wordo haci aña pasa, no ta wordo cumpli.

Tocante e situacion di diamars ultimo, Albertus a señala cu e no ta compronde con e situacion a yega na e punto aki unda cu maestronan, rector y co-rector a entrega un carta, “como directiva bo lo a tuma e carta, lesa e contenido y despues bin cu reunion, pero no, bo ta impulsivo, esey no ta manera como un bestuur cu ta representa scol pa den y pafo, bo tarea ta pa zorg pa tur cos por cana y pa desescala y no escala un situacion, loke ta lamentabel”, Albertus a sigura.

Di mesun manera ora docentenan a haya sa cu a e rector Croes a keda suspendi e docentenan a lanta para pa motibo cu “nan sa cu e no a haci nada malo, e ta trahando tur e temponan aki bon y na ningun momento nan tabatin problemanan cu nan rector, nan tin problema cu e bestuur pa e manera con e ta trata nan”, manera Albertus a bisa.

Albertus a informa cu nan como sindicato a manda un carta dirigi na prome minister Evelyn Wever-Croes, minister di Enseñansa Endy Croes y pa Obispado na Corsou pa asina ey nan por conoce e situacion cu ta tumando luga na e momentonan aki unda cu Albertus a declara cu nan ta espera pa un reunion pa asina sinta y papia, “pasobra esaki no ta un manera di trata hende” y ademas e tambe ta haya lamentabel cu e parti di enseñansa ta wordo stroba “pero pa por mustra enseñansa di calidad full e sistema mester ta trahando y si tin esnan ariba cu tin cu delinea y cu ta responsabel pa e sistema di enseñansa na scol no ta capacita, esaki ta e situacion cu ta sali di dje”.

Di mesun manera ayera mainta a tuma luga un reunion entre tur ekipo di Colegio Arubano y Simar unda cu abogado di rector Croes, esta Desiree Croes, tambe tabata presente y a expresa na Bon Dia Aruba cu suspension di sr Croes ta completamente robes, si ta existi e derecho di suspende si ta haya cu e persona no ta cumpli lo cual ta e instruccionnan como dunado di trabou pero no bao circunstancianan cu ta pasando na e momento ey, loke ta pone cu e situacion ta bira pio.

Asina mes, el a comenta cu ta bon pa mira con casi e mayoria di docentenan a para tras di e rector Croes y no di e directiva “lastimamente cada accion tin un consecuencia y un efecto cu ta cu awe no tin scol y awor e palabra ta na bestuur, nos ta espera cu nos por papia cu bestuur pa yega na otro pa por soluciona e situacion aki na un manera profesional y adulto”, abogado Croes a expresa.

Ademas, el a enfatisa cu e situacion ta pone cu ta posibel cu muchanan no lo tin scol den dianan cu ta bin si nan no ta yega na un acuerdo of solucion.

Di su parti, docente di Colegio Arubano Danilo Curiel tambe a duna su declaracion na Bon Dia Aruba tocante e situacion aki caminda el a manifesta cu “e problema ta cu directiva ta haciendo cosnan cu no ta full corecto, ta tuma decisionnan manera dictatorial sin consulta ningun hende y aworaki e ta bira cu no a consulta ni e rector mas, eynan mi ta kere cu esey ta suficiente, a ser manda un carta pa e bestuur unda nan ta pidi pa por baha unda nan a duna te dialuna 24 di januari of si lo sigui, pa tuma otro stapnan”, el a bisa.

Como docente e ta sinti cu ta algo duro y sin precedente, “nunca nada asina a pasa na Colegio Arubano unda un lider di bestuur ta agredi hasta un maestro y ta purba di cera un rector pa papia cune, e ta cosnan sin precedente unda no tin confiansa mas na Colegio Arubano”, el a finalisa.