Gobierno no a sconde e rapport di CARMABI. Es mas, a papia di dje varios biaha. Asina Minister encarga cu Transparencia, Integridad y Naturalesa, Ursell Arends a bisa.

“Ta for di 18 di October, menos di un luna despues di asumi e cargo di naturalesa, mi a elabora riba e problema di e RWZI na Bubali. Y dia 24 di November, hunto cu Sr. Gisbert Boekhoudt di DNM nos a presenta e rapport di CARMABI y na ningun momento nos a sconde e rapport aki y hunto cu e profesionalnan ta preparando riba e solucionnan,” Minister Arends a bisa na inicio di su conferencia di prensa (red. Bon Dia Aruba a haci diferente peticion pa e rapport, prome y despues di e fecha aki y nunca a ricibi esaki, te ora cu Fundacion CARMABI mes a publica esaki recientemente).

Director di DNM, drs. Gisbert Boekhoudt tambe a enfatisa cu a publica e rapport y a bisa cu e resultadonan no tabata un sorpresa y a bisa cu e ta contento cu awor por fin tin atencion pa medio ambiente y cu ta dun’e prioridad. E Director di DNM a ilustra cu pa hopi tempo tabata señala problema pero no tabata haya oido y “e herencia ta keda acumula, y esey ta bisto den e rapport di CARMABI. Awor por haci uso di e atencion cu a haya.”

Despues su colega drs. Oriana Wouters a duna un presentacion di e conclusionnan di e rapport di CARMABI, cu tabata ehecuta basa riba instruccion di e Departamento di Naturalesa y medio.

Segun Minister Ursell Arends, ningun momento kier desea politikeria riba e tema, pasobra si e problema ta afecta turismo, e ta afecta tur hende. E meta ta pa traha di forma structura na interes di tur. “Tin hopi nutriente den awa y sedimento cu ta produci alga y bacteria den awa cu ta pone siguridad di hende na peliger y ta parce cu tin sobrepesca y mester haci algo cu e tiramento di anker. Si kier pa e coralnan regenera, mester transforma e forma con ta desaroya y integra actividadnan entre e Ministernan, pa asina mehora colaboracion cu sector priva y ngo’s pa yuda naturalesa. Door di crea colaboracion por yega na un plan di accion basa riba naturalesa. Mester wak kico ta mas facil pa implementa,” Arends a splica.

“Coral ta deteriorando, salubridad y economia ta na riesgo y no tin espacio pa un solucion a corto plazo. E solucionnan mester a largo plazo y cu vision a largo plazo.”

RWZI y Salud

E aña aki lo inverti 16 miyon den e planta di RWZI, despues cu ya caba a haci algun trabou di mantencion cu a costa miyones. Pero e planta mester keda adapta pa acepta 15 mil cubico di awa pa dia, cu ta inclui e awa di e 2500 camber cu mester bin ainda.

WNBC a saca un reportahe na 2020, unda un turista a sufri infeccion bacterial te cu a haya e asina yama flesh eating bacteria na Aruba. Arends a bisa cu ningun momento ta pone salubridad di ciudadano y turista un banda. Diabierna ultimo a sinta cu DVG, DNM y ATA pa delinea kico ta bay ta e paso pa sigura salud pa tur hende. Riba pregunta con ta mira e keho di un turista cu a bisa cu el a haya e asina yama ‘flesh eating bacteria’ na Aruba, Arends a bisa cu te ainda esey ta e unico caso raporta, pero cu mester di colaboracion entre departamentonan pa mira si tin mas keho cu a drenta. “No tin dato concreto cu hende a bira malo. Pero un di e puntonan ta cu awor e awa den e sluisnan ya no ta bay lama sino lo bay na e saliña na Tierra del Sol y lo investiga e calidad di awa (di lama).”

Bubaliplas

Pa loke ta Bubaliplas mes, e Minister a bisa cu trabounan a inicia pa atende cu e lelinan, pa evita cu awa ta haya holo desagradabel. Den e siguiente simannan lo sigui cu e trabou, den colaboracion cu otro instancia entre otro cu Marinierskazerne cu a sosode den pasado.

Segun Ursell Arends su unico meta como Gobernante ta pa trece solucion.

Financiamento di e RWZI nobo

Segun e Minister, den proximo 6 a 8 siman lo haya sa kico ta e inversion necesario pa e planta pa asina por acomoda e necesidadnan. Tin combersacion cu stakeholders internacional pa mira si ta Pais Aruba mes ta sigui maneha e planta, pues si e ta keda den man di Gobierno, of e ta bira un PPP, cu maneho di otro. Mientrastanto, danki na industria di turismo a logra aloca e 16 miyon den presupuesto pa e trabounan mas urgente. Segun Arends, e sector di hotel ta dispuesto pa contribui unda cu por pa e maneho di desperdicio likido mester bay na forma responsabel. “Nan tambe ta compronde cu nan camber ta bal 400 dollar, pero si WC no por flush, e ta bal 0.”

Mientrastanto, mester bin cu un planta di purificacion di awa na Seroe Colorado, pero esaki lo bay pa cuenta pa e desaroyador di e proyecto hotelero grandi. Ainda mester finalisa detayenan di e planta aki.