(TheNewYorkTimes) – Ingrid Betancourt, ex-congresista y ken tabata rehen di guerrilla y a yega di simbolisa e brutalidad di e conflicto na Colombia como esfuerso di reconciliacion di e pais, lo postula pa presidencia, segun loke e mes a bisa diamars ultimo.
Betancourt ta drenta den un campaña presidencial hopi habri den un momento cu Colombia ta den un dilema politico y social determinante.
Ora el a ser secuestra haci 20 aña, Betancourt tabata haci campaña pa e mesun funcion. Awor, el a bisa cu e pais ta enfrenta e mesun “sistema corupto” y cu “mashinnan politico” cu el a combati na e momento ey.
“Awe mi ta akinan pa mi caba cu loke mi a cuminsa”, el a bisa den un entrevista na un hotel di Bogota, capital di e pais acompaña di su aliadonan.
Betancourt, ken a ser captura na 2002 y a keda secuestra durante mas di seis aña pa e mayor forsa guerrillero di e pais, Forsa Arma Revolucionario di Colombia, a anuncia su candidatura pa eleccionnan di mei mientras e pais ta enfrenta desafionan grandi.
Despues di mas di 50 aña di guera, e gobierno y e grupo rebelde, conoci como Farc, a firma un acuerdo di paz na 2016. Pero, for di e momento ey, un ola di gruponan arma a sigui combatiendo.
Violencia a aumenta den algun zona rural y esunnan mas critico ta culpa gobierno pa no inverti lo suficiente pa aborda e desigualdad y pobresa cu a contribui na e guera, manera a compromete ora a haci e acuerdo di paz.
Despues di añanan aisla -den cual na algun momento e tabatin cadenanan mara na dje- Betancourt a apoya e proceso di paz y tambe a critica Farc, pa loke a bira un simbolo di intento nacional di reconoce e costo di e guera, pero tambe con por super’e.
Aworaki tin mas di 20 candidato pa presidencia, e mayoria di nan mas conoci ta agrupa den tres coalicion: iskierda, lidera pa Petro, un di centro, den cual Betancourt ta uni, y un di derecha, cu nan miembronan ta considera como defensornan di e gobierno actual.
