Presidente di SVOA a trata di kita libertad di Rector di Colegio Arubano te cu polis mester a interveni. Asina a informa Bon Dia Aruba ayera tardi.

Bon Dia Aruba a compronde cu mr. Ernesto Rosenstand kier a reuni cu rector Tim Croes, pero cu e ultimo no tabata kier. Croes tabata den reunion cu docentenan riba nan descontento cu e directiva di Colegio Arubano, y net despues di scol, Rosenstand lo a yega pa papia cu e rector.

Sinembargo, segun a informa Bon Dia Aruba, Croes no tabata interesa pa a reuni e momento ey cu e Presidente di SMOA, pero e ultimo tabata insisti. A bay asina leu cu Rosenstand a cera e porta na yabi pa Rector Tim Croes no sali di e kantoor. Coleganan tabata bati na porta, pero envano y finalmente mester a yama polis pa resolve e problema. Entretanto a suspende Rector Croes.

Su abogado, mr. Desiree Croes di su banda a bisa cu a suspende drs. Croes den forma dictatorial y completamente innecesario.
“Ayera rector di Colegio Arubano a pidi mi conseho huridico den un situacion indesea cu e y mayoria di su docentenan ta den dje. E conseho a wordo duna y speransa tabata cu e situacion por wordo soluciona pacificamente.”

Segun mr. Croes, ayera tardi, mientras docentenan hunto cu conrectornan y e Rector di Colegio Arubano tabata den un reunion di urgencia pa presenta Directiva di SVOA un carta, “Presidente di SVOA a forsa mi cliente den un oficina y na un forma bruto obliga e Rector pa
splica kico a papia den e reunion cu docentenan. Logicamente cu e Rector no acepta e forma di ‘reuni’ aki. A yama Polis pa por calma e situacion cu a bira hopi tenso. Rector Croes a duna di conoce cu e ta keda dispuesto pa reuni pero den presencia di su abogado.”

Pero ta ora cu e abogado hunto cu su cliente tabata warda resto di directiva yega Colegio Arubano pa por a reuni, cu “directiva a dicidi di schors e Rector. E Rector no ta acepta e schorsing y ya a informa directiva esaki.”

Mientrastanto ta compronde di e cuerpo di docente di Colegio Arubano lo pone trabao completamente abao awe.

“Rector, conrectornan y docentenan ta spera cu directiva di SVOA sa di minimalisa e daño cu esaki por trece pa enseñansa na Colegio Arubano. Rector Croes un bes mas ta enfatisa cu e ta dispuesto pa papia cu directiva y sigui haci su trabao,” Desiree Croes a bisa den un declaracion.

Bon Dia Aruba a compronde di diferente docente cu nan ta para tras di Rector Tim Croes y simplemente no tin confianza den e miembronan di directiva di Colegio Arubano.

Reaccion SIMAR
 Mientras tanto, sindicato di maestro SIMAR a reacciona den un comunicado di prensa. “[Ayera] tardi un sudedido na Colegio Arubano a escala, unda a schors e Rector di e scol menciona. E situacion na Colegio Arubano pa basta tempo ta tenso. E relacion di e Directiva di Colegio Arubano cu e docentenan no ta na un manera sano. E base di confianza cu mester tin entre e Directiva y e personal no t’ey y [ayera] tardi e situacion a sali for di man.

“E Presidente di e Directiva, den persona di Sr. Ernesto Rosenstand, a haya ta bon pa schors e Rector, Sr. Tim Croes, sin cu tin un motibo valido. E docentenan ta hopi disgusta cu e situacion cu ta reina na Colegio Arubano y ta desaproba tal actitud di e Presidente y ta duna nan sosten na e Rector.

“E consecuencia di e sucedido a resulta cu gran mayoria di e docentenan a dicidi cu [awe], diaranson 19 di januari 2022, lo no duna les na e alumnonan. Nos ta lamenta cu e situacion mester a yega asina leu, pero mirando cu pa basta tempo no ta mira ningun mehoracion, e docentenan ta sinti nan mes obliga pa tuma tal decision.

Directiva di SIMAR, e Sindicato di Maestro di Aruba, ta na altura di e sucedido y nos ta para pa e interes di su miembronan cu ta labora den sector di Enseñansa. Nos ta spera cu den tempo rapido por bin cu un solucion cu ta trece trankilidad, pa asina por minimalisa e daño cu esaki por trece pa enseñansa na Colegio Arubano.”

.