Abuso di weganan online ta un tema cu ta trece preocupacion for di algun tempo caba y cu durante pandemia el a aumenta. Cuarentena, uni na e cambionan di orario di soño cu hopi hende a padece a pone e topico aki riba mesa un biaha mas.

Ta p’esey cu for di 1 di januari di 2022, den e manual di malesanan elabora pa Organisacion Mundial di Salud (OMS) adiccion na weganan online a ser inclui.

Na 2018, OMS a anuncia caba su idea di publica un manual referi na e adiccion aki cu tabatin un aumento tambe. Por ehemplo, ultimo estadisticonan na Argentina ta indica cu tin 19 miyon hungado, loke ta nifica 42% di habitantenan, ademas durante epoca di aislamento e number di e cantidad di hungado a aumenta cu un 20% aproximadamente.

E adiccion pa e weganan aki ta afecta diferente edadnan y tin su consecuencianan den e falta di concentracion na scol, trabao y ta aleha e personanan di nan bida social como reunion cu nan famia y amigonan.

Segun e documento di OMS, adiccion na weganan online tin relacion cu un patronchi di comportamento, “caracterisa pa perde e control riba e wega” ta e punto di priorisa e actividad aki riba otro interesnan y otro actividadnan diario.

Pa OMS “Trastorno di weganan” ta ubica na e categoria di malesanan cu tin relacion cu comportamento adictivo cu algun personanan ta sufri, sinembargo, nan ta aclaria cu, di e mesun manera cu ta sucede cu otro malesanan adictivo, nan no ta condena su uso, sino su abuso.

E adiccion aki ta den e clasificacion di trastorno mental, di conducta of di neuro-desaroyo. “Ta caracterisa pa e incapacidad di resisti un impulso of urgencia di haci un acto cu lo ta gratificante pa e persona”, for di organismo di Nacionnan Uni specialisa den gestion di politica di prevencion, promocion y intervencion di salud a indica.

Di tur manera, pa OMS, uso excesivo no semper ta indica un adiccion. Ta p’esey cu nan a señala cu adiccion lo a mester ta diagnostica si ta dura por lo menos un aña, y si cu su uso, ta perhudica di manera significativo e habilidad di e hungado pa maneha su mes den e bida diario.

Adopcion di politicanan referi na prevencion ta resulta compatibel pa loke ta trata e importancia economico cu industria di weganan tin rond di mundo. Esaki ta un actividad cu ta mobilisa cerca di 90 miyon dollar pa aña y ta involucra por lo menos 2.000 cupo di trabao na un pais so cu ta Argentina. Weganan online no ta nifica diversion so, nan tambe tin un potencial educativo grandi y cultural.

Cu yegada di pandemia di Covid-19 a realisa strategianan nobo pa via di nivelnan halto di conectividad, tur di nan tabata enfoca riba uso responsabel di weganan na Argentina, ademas nan a publica un guia cu informacion cu lo permiti mehora siguridad y privacidad pa via di e preocupacion pa aumento di delito cibernetico.

Na Spaña, Defensoria a presenta un herment cu strategianan internacional como un programa “Pantaya amigabel” cu e cual nan tabata busca un “disminucion digital”, e fin di e programa ta pa reduci progresivamente exposicion di personanan na un monitor.

Cu tur e hermentnan aki nan ta busca reeduca e habitonan pa logra un miho forma di bida y di consumo.

Pa disminui e uso di monitor, nan ta duna algun recomendacionnan: Wak bo mes, identifica ki cosnan bo ta haci cu bo telefon, rednan social of weganan online cu prome cu pandemia bo no tabata haci, wak e cambionan, detecta e areanan pa mehora y elimina conductanan adkiri como drumi cu e telefon, cambio di orario pa hunga of bishita websitenan di streamer, oranan di uso di rednan social, entre otro.

Establece obhetivonan, genera strategianan como cambia di custumber, recupera orarionan habitual di actividadnan y midi e avancenan, stop uso di telefon pa un par di ora.

Algun specialistanan ta recomenda pa reduci e exposicion na monitornan como pa mucha y adulto ya cu esaki lo tin consecuencianan na largo plaso.

Cu paso di tempo muchanan ta cuminsa sufri den nan wowonan y nan por desaroya miopia, segun OMS nan ta calcula cu pa 2025 e cifra di personanan miope por yega na 324 miyon persona.