E indiferencia delibera di Minister Ursell Arends pa bida y salud di cada persona cu ta uza nos playanan ta criminal. Aparentemente e no tin ningun consideracion pa ningun di e 1 miyon turista cu ta bishita nos isla tur aña, ni tampoco pa nos mes cu ta biba aki na Aruba.

Ursell Arends a lesa e rapport di CARMABI cu ta bisa cu di cada 1000 hende cu ta landa den e awanan pazuid di nos isla 32 persona lo bira malo. Toch e ta insisti pa sigui e politica di Gabinete Wever-Croes: keda keto y tapa berdad. Ursell tabata tin mas cu 100 dia pa sigui ehempel di Florida y pone borchinan cu aviso di e peliger aki. Awo, despues di lunanan cu mi persona ta pidi atencion pa e rapport di CARMABI y hasta mi a publica e draft, Minister Arends ta purba haci damage control. Na AHATA e ta bisa cu e no tin problema pa comparti e rapport. Pa colmo e ta acusa na manera engañoso cu entre otro mi persona kier uza e rapport di CARMABI den un contexto maligno y cu mi ta duna esaki un interpretacion falso. Hasta e ta acusa nos di causa daño na nos industria hotelero, na nos economia y na tur habitante di nos isla. Mientras tanto e minister ta keda keto keto encuanto e contenido di e rapport. P’esey mi ta urgi cada ciudadano lesa e rapport pa su mes.

E rapport di CARMABI ta splica bon cla cu nos lama ta contagia. Riba pagina 35 ta bisa entre otro: “Exceeding upper limits implies that 32 out of 1000 people using such water for recreation etc. will get ill from sewage associated bacterial diseases. If abundances of Enterococci exceed 70 CFU/100 ml the use of such waters in Florida, with roughly a similar Caribbean climate, is immediately discouraged.” Hasta ta menciona: “the amount of sewage waters entering Aruba’s coastal waters appears significant and locally exceeds limits for safe use by humans.’

Para y pensa! Ursell Arends y su coleganan minister sa cu e cantidad di bacteria fecal (procedente di pupu) ta trece malesa serio. Tin un abundancia di entre otro e bacteria Enterococci, cu ta causa infeccion den e tracto urinario, infeccion abdominal, bloodstream infection, infeccionnan neonatal (hende muhe na estado), infeccion di sistema nervioso central etc.

Señor Ursell Arends, cuanto hende muhe na estado a perde nan yiu pa motibo cu nan a landa den nos awa contamina? Cuanto turista a bay nan pais bek cu infeccionnan grave di cuero, di boca of di un herida? Cuanto hende mester bira malo of mester perde bariga prome cu bo ta tuma e situacion aki na serio? E caso aki merece un class action contra gobierno a base di articulonan 2 y 8 EVRM (Europees Verdrag voor de Rechten van de Mens). Por fabor informa nos Pueblo y nos turistanan di e peliger y e riesgonan di landa den e lama aki. Bo tin un obligacion pa informa y pa proteha e salud y bida di hende. Bo ta na haltura di e gravedad di e peliger cu ta nos lama. Haci bo trabao y planta bo simia di gobernacion responsabel!