Marisol Lopez Tromp como Minister no tabatin acceso na e rapport
Fraccion di MAS hunto cu Accion21 a pidi un reunion publico pa tres Minister bin splica e rapport di CARMABI. Drs. Marisol Lopez Tromp tabata Minister ora cu CARMABI a traha riba e investigacion, pero segun Lopez Tromp, e mes no a haya e rapport. Es mas, el a tende di dje pero no a ricibi detaye. “Mi no a ricibi e rapport. Mi a tende cu tin un CARMABI rapport den concepto. Ami tabata kier e.”
Segun Lopez Tromp, apenas el a sinta como Minister encarga cu Medio Ambiente y Infrastructura, el a haci gestion pa bay reuni cu e investigadornan di CARMABI riba e rapport.
“Pero e no a bay door, pasobra nos a drenta e pandemia. Mi a pidi pa un cita cu e centro na Corsou, pa busca e rapport. Mi tabata di bay mi mes, pasobra tabatin yen di secresia rond di e rapport. Pero mi no por a bay mas.” Segun Lopez Tromp el a mira varios pida di concepto ta pasa su dilanti ora cu e tabata Minister, pero no e rapport completo mes. Pero tur hende den Gobierno tabata actua manera cu e rapport mester keda secreto. Ningun hende tabata sa unda e tabata. Awor ta CARMABI mes a publica e rapport. Ta bon toch? No sconde e rapport y traha riba e solucionnan.” Marisol Lopez Tromp ta haya yamativo cu Minister di Medio Ambiente y Naturalesa ta critica publicacion di e rapport, basa riba e pensamento cu e ta malo pa turismo.
“Ridiculo. E rapport no ta pa turismo, sino pa nos mesun pais, pa nos mesun coralnan na prome luga. (Nan) ta acerca e problema manera cu lama ta unicamente un atraccion.”
Ta bon cu e rapport ta publico
Segun Lopez Tromp, e ta straño cu e persona encarga cu Naturalesa ta mas preocupa pa turismo cu locual su responsabilidad, cu ta e situacion di e condicion di rifnan. “Mi ta sinti cu e kier tene e topico keto. Nos a pidi reunion publico, pa Prome Minister Evelyn Wever Croes, Minister di Turismo Dangui Oduber pero tambe Minister di Naturalesa Ursell Arends splica kico nan ta bay haci cu e conclusionnan di e rapport. Nos kier sa kico ta nan plan y kico por haci ainda. Pero ta parce cu nan no kier trata e topico aki.”
Lopez Tromp ta haya bon cu e publicacion a sali. “Corda bon, si ta placa di Gobierno a paga pa e estudio, no mester tin secreto. Pakico e no por sali.”
Locual ta ironico, ta cu un di e motibonan cu fraccion di POR, sosteni pa resto di coalicion e tempo, a dicidi cu mester baha Marisol Lopez Tromp como Minister, ya cu e lo no tabata kier a sostene un maneho di tolerancia pa piscamento cu harpun. Finalmente tabata Conseho di Minister mes a retira Marisol Lopez Tromp. Pero segun e lider di MAS, e ta convenci cu coalicion a djis usa e excuus di e ‘gedoogbeleid’ cu ta contra e Ley di Naturalesa pa bah’e for di e funcion. “E no tabata un motibo real. E punto ta cu nan a malusa e momento pa saca mi afo. No tabata berdad cu nan tabata preocupa pa piscado durante pandemia. Pasobra Andin Bikker tabata kier a permiti piscamento cu harpun pa hopi tempo caba. Ami si ta contento cu e rapport a Sali y mester us’e pa mira con pa preveni y percura pa restaura e condicion di lama mas tanto cu por.” Ki mishi Minister Arends a informa AHATA riba e rapport y ta critica e hecho cu e rapport a keda publica, ta e pregunta grandi di Marisol Lopez Tromp.
Dump ta keda un monster
Mester bisa cu Marisol Lopez Tromp tabata e Minister encarga cu dump tambe cu segun CARMABI ta un di e problemanan mas grandi pa e calidad di awa y rif. Riba dje, dump ta un tema cu a domina durante diferente campaña politico, y berdad a inverti hopi placa pa alarga su bida, pero cu na final, no a resolve nada. Den fin di siman, un biaha mas dump tabata na candela y tabata manda hopi huma preto. Awor ta cla tambe cu ta usa e incinerador mas tanto pa kima e slib cu ta bin di e planta di purificacion di awa di Bubali, cu tambe ta rekeri inversion cuantioso pasobra no por carga tur e awa sushi cu ta yega na dje.
Medical waste no ta bay den incinerador
Consecuentemente e incinerador no ta kima e sushi medico, locual drs. Lopez Tromp y despues, mr. Evelyn Wever Croes cu a tuma e cartera despues, a bisa den Parlamento. “Ainda ta asina cu nan ta kima e desperdicio medicinal den habri, siendo cu e no mester ta asina. Ora cu mi tabata Minister, e intencion di e incinerador tabata pa tipo di sushi aki. E incinerador tin su necesidad.”
Pero no ta na dump di Parkietenbos so ta deshaci di ‘medical waste.’ E candela grandi na Moko recien tabata den e area unda ta deposita, mesun cos cu Seri Teishi, baliñanan cu sushi, incluso medical waste. E candela grandi tabata den e dam ey cu a crea hopi molester.
Den otro palabra, e problema di desperdicio di Aruba ta un monster cu tin decadanan ta crece y pa un of otro motibo, Aruba a inverti miyones cu no a resulta efectivo.
Pa Lopez Tromp, e ta un punto di urgencia pa Minister Arends bolbe Parlamento y splica detaye, pasobra ya no por warda. “Ora cu el a bin duna presentacion aña pasa, e no a bisa nada tecnico. Tabata su prome reunion como e Minister encarga. Pero mi no sa kico su maneho lo ta, pasobra a keda un hende so den directiva di Serlimar y nos no ta haya ningun informacion di e maneho. Si mi no wak e potretnan lo mi no tabata sa kico tabata pasando riba dump. Mi a tuma contacto cu ex Director di Serlimar cu a bay riba lista di Raiz, pero Sr. Koopmans ya no ta envolvi ni cu RAIZ ni cu Serlimar.”
