Despues cu Center for Disease Control di Merca (CDC) a pone Aruba na nivel di riesgo halto pa biahe, por a mira diferente potretnan riba social media cu ta reporta vuelonan bashi cu destino na Aruba den ultimo dianan aki aunke casonan pa Covid-19 ta bin bahando den cifranan e ultimo siman.
Manera ta conoci cancelacion di turistanan ta bin tumando luga pa via di e presencia di variante Omicron na isla di Aruba y na Merca tambe unda cu AHATA a reporta esaki par di siman pasa indicando cu turistanan y nan famia mester a cancela nan biahe pa Aruba debi na contagio cu Covid-19.
Reportero di Bon Dia Aruba a tuma contacto cu Federacion di Trahadonan di Aruba (FTA) unda cu door di tin cancelacion di turistanan (25%) a puntra si esaki tin efecto riba empleo den sector hotelero y kico FTA sa tocante e keho cu hopi hende por haya solamente un contract temporal cu un contratista y awor por bay cas atrobe.
Tocante esaki Hubert Dirksz tesorero di FTA a splica cu “berdad, e cancelacion ta hopi mas grandi cu loke nos a pensa y esaki ta afectando e hotelnan caba, maske e proyeccionnan tabata mustra hopi bon, naturalmente e hotelnan kier tuma medida pa reduci orario di trabou pa asina mantene e empleadonan na trabou te na momento cu e situacion recupera back. No tin un bista con largo e situacion lo dura y te con leu e consecuencia lo ta, probablemente esnan riba contracto of via uitzendbureau lo wordo manda cas”, Dirksz a sigura.
Ademas di esey, el a menciona cu lo ta bon si ta busca e cifranan exacto di con e situacion ta pa evalua ki medida por tuma pa reduci e impacto, “ta conoci cu e situacion aki si e keda largo e lo por causa impacto pa comercio y caha di gobierno. Pero nos tin e speransa cu na momento cu e parti aki pasa e situacion lo por recupera rapidamente”, el a finalisa.
