Den un noticiero local a sali un entrevista cu e lider di partido politico Pueblo Prome, Michael Williams, den cual el a anuncia cu e compania Integraciones Industriales Ojeda CA, un empresa Venezolano, lo ta interesa pa participa den suministro di petroleo na Aruba. Esaki lo por facilita reapertura di e refineria, cu aki dos luna ta cumpli 10 aña cera. E empresa lo ta doño di un pos di petroleo na Colombia, den teritorio indigena, cu lo por percura pa e materia prima cu Aruba mester.
Bon Dia Aruba a haci su propio averiguacion encuanto e compania aki y ta resulta cu ta trata di un compania di tamaño desconoci, den e parti west di Lago di Maracaibo, cu ta e region cu cada vez ta produci menos petroleo y cu tin hopi empresa liga na e sector cu ta paraliza. E compania aki lo ta activo riba tereno di suministro y mantenimento di equipo y material pa industria petrolero, principalmente den perforacion di pos petrolero. Segun informacion disponible e empresa ta un di e cantidad grandi di empresa local cu ta brinda nan servicio na e empresanan estatal cu ta responsable pa exploracion, explotacion, transporte, refinacion y exportacion di produccion petrolero. Tur esaki bao e capa di Petroleos de Venezuela S.A. (Pdvsa), e empresa estatal cu ta cubri y dirigi tur actividad den teritorio Venezolano cu tin di haci cu petroleo. Lo ta remarcable cu un empresa asina, desconoci na nivel nacional na su propio pais, lo ta propietario di pos di petroleo na Colombia.Esaki aun mas pasobra na Colombia tambe tin un control estricto riba henter e sector di petroleo, unda gran parti di e actividadnan petrolero ta sucede bao di e capa di e compania nacional di petroleo, Ecopetrol y su partnernan internacional.
Ademas e cifranan general di petroleo Colombiano. Produccion di crudo ta na un poco menos di 800.000 bari pa dia, cu apenas ta suficiente pa cubri necesidad di e pais di producto petrolero. Segun e website Colombiano crudotransparente.com e autosuficiencia energetico di e pais ta na riesgo, ya cu e reservanan di crudo y gas, segun e ultimo datonan entrega pa Ministerio de Minas y Energia y Agencia Nacional de Hidrocarburos (ANH), ta na 6,2 aña pa petroleo y 9,8 aña pa gas. Tambe e pais ta sufri di falta di hallazgo nobo ‘onshore’, motibo pa cual ta pone enfasis pisa riba exploracion ‘offshore’ actualmente. Den e situacion aki ta dificil pa imagina cu gobierno Colombiano lo permiti exportacion di crudo mientras e pais mes ta encontrando problema di abastecimento pa e mercado local.
Awor e situacion na Aruba. Tin un refineria para 10 aña caba, cu ta bay costa, segun ultimo compania cu a purba haya financiamento pa renoba, Quanten LLC, por lo menos 3,5 biyon dollar. Ta dificil imagina cu un compania menor na Venezuela lo por haya financiamento pa esaki, si ni e compania nacional, Pdvsa, ta capaz pa logra haya tal suma pa inverti.
Nota di Redaccion
Tur esaki ta parce atrobe un storia ‘too good to be true’ cu ta haci nos corda e aventura cu e mesun persona aki, hunto cu e empresario Venezolano Francisco Javier Gonzalez, kier a crea cu e meta di logra reapartura di e refineria na San Nicolas. Nos sa unda esey a termina.
