(NLTimes) – Muchanan cu ser saca for di nan cas y nan mayornan no semper ta haya e apoyo y sosten cu nan tin mester, Defence for children a mira den un estudio.
Empleadonan di cuido preocupa a conta e organisacion di derechonan di mucha cu hopi di e casonan aki unda cu muchanan ta ser saca for di nan cas por a ser preveni si lo a brinda mas apoyo y cuido, NOS a reporta.
“Ora ta saca un mucha for di cas, e ta un evento hopi emocional y impactante,” abogado Eva Huls, ken a conduci e estudio a expresa na NOS. “Cuido apropia y guia pa e muchanan y mayornan ta necesario pa preveni cu mester saca un mucha for di su hogar y pa baha e cantidad anual. Hulanda ta fracasando den esaki y mester traha duro ma motibo cu muchanan tin derecho di e miho cuido adecua, y no e alternativa menos malo.”
E investigadonan a papia cu mas o menos 100 profesional di cuido.. Nan a bisa cu casi mita di e mayornan no ta ricibi e ayudo apropia prome cu y ora cu nan yiunan ser saca for di e cas. Un di e problemanan ta listanan largo di espera den e cuido di salud mental. Otro problema ta cu varios organisacion ta involucra cu e proteccion di hobennan, y no semper nan ta usa e mesun metodonan.
“E metodo usa pa traha por ta hopi diferente den cada institucion,” Huls a bisa e noticiero. “Nos mester traha di un manera mas uniforme y mira un famia na un manera mas intrgro, na luga di cada proveedor di cuido dirigi nan mesun piesa special.”
Segun Huls, varios partido a somete proposicion pa mehora e situacion na e Gobierno durante e ultimo ananan, pero hopi tiki a ser haci cu e proposicionnan aki. “Clarifica y drecha loke ta impedi e mehoracionnan aki, y kita e obstaculonan pa asina nos por traha riba reduci e cantidad di muchanan cu ta ser saca for di nan cas.”
Den aña 2020, mas o menos 43,000 muchanan na Hulanda no ta bibando den nan situacion di vivienda original. E corte hubenil a saca casi 19,000 muchanan for di nan cas e aña ey.
