Na 2019 IMF a haci un analisis di gasto di personal di gobierno di Aruba, den cooperacion di gobierno mes, cual resultado a keda publica pa gobierno. Riba website di ministerio di Finanzas y Cultura por haya e resumen di e informe aki, na Hulandes, cu su corespondiente graficonan.

E datonan general di e investigacion aki ta papia pa nan mes. Gastonan di personal y interes riba prestamo ta e dos categorianan mas grandi na e momento ey riba presupuesto di gobierno. Den e texto gobierno mes ta bisa cu “E gastonan di salario no por sigui subi y gobierno mester considera reduci esakinan pa por yega na finanzas publico controlable y duradero”.

Den e investigacion IMF a haci un comparacion entre gasto di personal den sector publico y priva y alavez a haci un comparacion entre Aruba y otro paisnan di tamaño comparable. E resultado ta indica cu e gastonan di salario di sector publico ta considerablemeente mas halto cu di sector priva. Entre esnan cu ta haya salario paga pa gobierno por haci distincion entre e personal di gobierno mes y esnan cu ta traha den sector subsidia. E estudio a mustra cu e empleado publico ta gana como promedio 40% mas cu hende den sector priva, mientras esnan subsidia ta gana 20% mas, como average.

Tambe den e comparacion cu otro paisnan por constata cu e nivel di salario ta bastante mas halto cu e otro paisnan. Esaki no ta un sorpresa tampoco, pasobra den un analisis haci na Aruba mes pa e asina yama National Commission on Public Finance, na 2007, a yega na e conclusion cu e nivel di salario di e empleado publico na Aruba tabata desproporcionalmente mas halto cu e region. Ademas tin proporcionalmente hopi mas empleado den sector publico cu den e demas paisnan.

Tambe gasto di overtime ta keda señala como un problema cronico cu ta yega na 5% di e total di gasto. Sin embargo ta constata tambe cu den ministerio di Husticia overtime ta alcanza e nivel di 17% di presupuesto. Den e situacion actual no por descarta e problema di gasto creciente di overtime, na momento cu mester acorda cu sindicatonan pa traha menos dia pa luna, como compensacion pa e actual reduccion di salario.

Gasto berdadero di personal

Den e protocol cu gobierno di Aruba y Hulanda a cera na november di 2018 encuanto e supervision financiero y e normanan cu cual gobierno di Aruba mester cumpli, ta menciona un maximo di Afl. 479 miyon pa e gastonan di personal, alavez cu a yega na e acuerdo cu anualmente Aruba mester mustra un tendencia descendiente structural y nominal den gasto di personal. Pa esey gobierno di Aruba a desaroya e Plan di Maneho di Reduccion di Gasto di Personal (na Hulandes BVP), di cual recientemente CAft como supervisor financiero ta constata cu no ta ehecutando e plan aki cu gobierno di Aruba mes a elabora y presenta.

Tambe mester tuma na consideracion cu e gastonan menciona den e protocol ta contempla solamente e gastonan di personal di e ministerionan, y no e gastonan di e entidadnan halto di estado (Staten, Rekenkamer, Raad van Advies) y e empresa gubernamental DOW, ni e salarionan di e sector subsidia. Esakinan hunto den e presupuesto 2020 ‘pre-Covid’ tabata yega na Afl. 733 miyon, segun analisis di Raad van Advies riba presupuesto di e aña ey, cu despues a haya cambio grandi, cu reduccion di salario di e sector cu 12,6%. Un impresion mas completo di e peso grandi cu gasto di personal tin pa gobierno ta bin di e tabel elabora pa IMF den e mesun estudio referi, y cu ta indica cu e gastonan na 2018 tabata na Afl. 605 miyon, pero sin conta aden e Afl. 72 miyon di e sector di fundacion subsidia.

Nota di Redaccion:

Ta parce nos di suma importancia pa tuma nota di e situacion grave di gasto di personal, mientras cu no ta mira cambio structural ta aparece, pero si gobierno ta contemplando laga empleado publico traha menos ainda, cu e realidad cu ya caba empleado publico tin un cantidad increible di dia liber, cu ta mas di dos biaha e cantidad den sector priva, manera ilustra den nos edicion di dia 10 di januari 2022, ademas di e salarionan mas halto di e region. Esaki ta e contexto berdadero pa e negociacion actual entre sindicato representando empleado publico, y gobierno di Aruba.