Ayera den su resumen diario riba e desaroyonan di pandemia di Covid-19, Departamento di Salubridad Publico, DVG a informa cu datonan di cual e departamento ta dispone ta indica un averahe semanal di 793 caso nobo di covid-19 pa dia na Aruba.
Segun e resumen di DVG di ayera, 1047 persona a recupera, mientras a registra un total di 710 caso nobo di e malesa causa pa e virus SARS-CoV-2, di cual 63 no ta residente di Aruba. E cifranan aki ta representa un tasa di positividad entre nos residentenan di 66 porciento. Segun Organisacion Mundial di Salud (WHO), na momento cu e tasa di positividad ta mas cu 5 porciento, ta indica cu mester aumenta e cantidad di test cu ta haci entre e poblacion. Sinembargo, conseho di DVG ta pa no haci test tanten cu no tin sintoma.
E cantidad di caso activo di Covid-19 ayera tabata 3,342, y e cantidad di fayecido relaciona cu Covid-19 ta 182. E datonan aki ta ilustra ademas un averahe di tasa di positividad semanal di 63 porciento pa dia.
Actualmente na Aruba tin 30 persona hospitalisa den Hospital Dr. Horacio Oduber pa ricibi tratamento pa Covid. Di esakinan, cuatro ta den Unidad di Cuido Intensivo (ICU), y 26 ta riba piso general. Ademas na Colombia tin actualmente 3 pashent di Aruba den ICU, y ningun riba piso general.
